By Good Assam || Dec 4 , 2024
ব্লিডিং আই ভাইৰাছ কি ? মাৰ্বাৰ্গ ভাইৰাছক ব্লিডিং আই ভাইৰাছ বোলা হয়। এই ভাইৰাছৰ বাবে চকুৰ পৰা ৰক্তক্ষৰণ আৰম্ভ হয় আৰু এই কাৰণেই মানুহে ইয়াক ব্লিডিং আই ভাইৰাছ বুলিও কয়। এই ভাইৰাছে আফ্ৰিকাৰ দেশ ৰুৱাণ্ডাৰ লোকক সংক্ৰমিত কৰিছে।
এতিয়ালৈকে বিশ্বৰ পৰা Covid শেষ হোৱা নাই আৰু নতুন ভাইৰাছৰো বিয়পি পৰিছে। বৰ্তমান আফ্ৰিকাৰ দেশ ৰুৱাণ্ডাত মাৰ্বাৰ্গ ভাইৰাছে বিধ্বংসী ৰূপ ধাৰণ কৰিছে আৰু ইয়াৰ ফলত ১৫ জন লোকৰ মৃত্যু হৈছে। শ শ লোক মাৰ্বাৰ্গ ভাইৰাছত আক্ৰান্ত হৈছে আৰু ইয়াৰ ক্ৰমবৰ্ধমান বিপদৰ পৰিপ্ৰেক্ষিতত প্ৰায় ১৭খন দেশৰ ভ্ৰমণকাৰীৰ বাবে সতৰ্কবাণী জাৰি কৰা হৈছে। মাৰ্বাৰ্গ ভাইৰাছৰ বাবে মানুহৰ চকুৰ পৰা তেজ ওলাবলৈ আৰম্ভ কৰে, যাৰ বাবে ইয়াক ব্লিডিং আই ভাইৰাছ বুলিও কোৱা হয়। এই ভাইৰাছৰ লগত জড়িত গুৰুত্বপূৰ্ণ কথাবোৰ জানিবলৈ পঢ়িব -
বিশ্ব স্বাস্থ্য সংস্থাৰ (WHO) প্ৰতিবেদন অনুসৰি মাৰ্বাৰ্গ ভাইৰাছ ইব’লা ভাইৰাছ পৰিয়ালৰ সৈতে জড়িত, যাৰ ফলত ভাইৰেল হেমৰেজিক জ্বৰ হয়। এই ভাইৰাছে মানুহৰ ৰক্তবাহী নলীৰ ক্ষতি কৰে আৰু আভ্যন্তৰীণ ৰক্তক্ষৰণৰ অৱস্থাৰ সৃষ্টি কৰিব পাৰে। মাৰ্বাৰ্গ ভাইৰাছ এটা জুনোটিক ভাইৰাছ, অৰ্থাৎ ই প্ৰাণীৰ পৰা মানুহলৈ বিয়পি পৰে। ই বাদুলি বা অন্য জন্তুৰ পৰা উৎপত্তি হয় আৰু ই তেজ, প্ৰস্ৰাৱ বা লালতিৰ সংস্পৰ্শৰ দ্বাৰা মানুহলৈ বিয়পে। এই ভাইৰাছ অতি বিপজ্জনক আৰু ইয়াৰ দ্বাৰা আক্ৰান্ত হ’লে বহুতে প্ৰাণ হেৰুৱাই পেলায়।
মাৰ্বাৰ্গ ভাইৰাছৰ লক্ষণসমূহ কি কি?
WHOৰ তথ্য অনুসৰি মাৰ্বাৰ্গ ভাইৰাছৰ লক্ষণ ইবোলা ভাইৰাছৰ দৰে। এই ভাইৰাছত আক্ৰান্ত হ’লে মানুহে তীব্ৰ জ্বৰ, তীব্ৰ মূৰৰ বিষ, পেশীৰ বিষ, বমি, ডিঙিৰ বিষ, ফোহা আৰু ডায়েৰিয়া আদি সমস্যাত ভুগিব পাৰে। গুৰুতৰ ক্ষেত্ৰত এই ভাইৰাছে আভ্যন্তৰীণ ৰক্তক্ষৰণ আৰু অংগ বিকল হৈ মানুহৰ মৃত্যু ঘটাব পাৰে। ভাইৰাছৰ সংক্ৰমণ বাঢ়িলে হঠাৎ ওজন কমি যোৱা, নাক, চকু, মুখ বা যোনিৰ পৰা তেজ ওলোৱা আৰু মানসিক বিভ্ৰান্তিৰ দৰে সমস্যাৰ সৃষ্টি কৰিব পাৰে। এই ভাইৰাছ প্ৰথম ১৯৬১ চনত জাৰ্মানীৰ ফ্ৰেংকফৰ্টত পোৱা গৈছিল।
Marburg ভাইৰাছৰ চিকিৎসা কি?
বিশেষজ্ঞসকলৰ মতে, মাৰ্বাৰ্গ ভাইৰাছৰ সঠিক চিকিৎসা উপলব্ধ নহয়। এই ভাইৰাছৰ মৃত্যুৰ হাৰ ২৪%ৰ পৰা ৮৮% হ’ব পাৰে। যেতিয়া মানুহ এই ভাইৰাছত আক্ৰান্ত হয় তেতিয়া লক্ষণৰ ভিত্তিত তেওঁলোকক চিকিৎসা প্ৰদান কৰা হয়। বৰ্তমান মাৰ্বাৰ্গ ভাইৰাছৰ চিকিৎসা তেজৰ সামগ্ৰী, ইমিউন থেৰাপী আৰু কিছু ঔষধৰ দ্বাৰা কৰা হৈছে। এই ভাইৰাছৰ প্ৰতিষেধক এতিয়াও উপলব্ধ হোৱা নাই যদিও ভেকচিন প্ৰস্তুতৰ প্ৰক্ৰিয়া প্ৰাৰম্ভিক পৰ্যায়ত আছে। এনে পৰিস্থিতিত যদি মানুহ এই ভাইৰাছত আক্ৰান্ত হয়, তেন্তে তেওঁলোকৰ অৱস্থা গুৰুতৰ হ’ব পাৰে।
তেজ ওলোৱা এই ভাইৰাছ কেনেকৈ প্ৰতিৰোধ কৰিব পাৰি?
প্ৰথমে জীৱ-জন্তুৰ পৰা সাৱধান হ'ব। পক্ষী বা বাদুলিয়ে খোৱা ফল-মূল গ্ৰহণ নকৰিব। পোহনীয়া জীৱ-জন্তুবোৰৰ পৰাও সাৱধানতা অৱলম্বন কৰিব। হাত - ভৰিত গ্লোভছ, মুখত মাস্ক আৰু চকু ঢাক যোৱা ছচমা পিন্ধি জীৱ-জন্তুৰ ওচৰলৈ যাব। জীৱ-জন্তুৰ ওচৰৰ পৰা আহিলে ভালদৰে মুখ-হাত ধুব। বাহিৰলৈ গলে হাত চাবোনেৰে নুধুৱাকৈ নাক, মুখ আৰু চকু হাতেৰে চুব নালাগে।
আক্ৰান্ত লোকৰ সংস্পৰ্শৰ জৰিয়তে মাৰ্বাৰ্গ ভাইৰাছ বিয়পে। শৰীৰৰ তৰল পদাৰ্থৰ জৰিয়তে ই আন মানুহলৈ বিয়পিব পাৰে। ইয়াৰ পৰা নিজকে ৰক্ষা কৰিবলৈ মাৰ্বাৰ্গ ভাইৰাছত আক্ৰান্ত অঞ্চললৈ নাযাব। সামাজিক দূৰত্ব, মাস্ক ব্যৱহাৰ আৰু সঘনাই হাত ধোৱাৰ দ্বাৰা এই ভাইৰাছৰ পৰা হাত সাৰিব পাৰি। ইয়াৰ উপৰিও আক্ৰান্ত ব্যক্তিৰ প্ৰত্যক্ষ সংস্পৰ্শৰ পৰা বিৰত থাকিব লাগে। এই ভাইৰাছৰ পৰা হাত সাৰিবলৈ সাৱধানতা অৱলম্বন কৰাটো বহুত জৰুৰী।
