By Good Assam
যদিও ভাৰতত প্ৰতিদিনে চাইবাৰ কেলেংকাৰী সংঘটিত হৈ আছে, কিন্তু বৰ্তমানৰ নতুন পৰিসংখ্যাই আচৰিত কৰিছে। মোবাইল ভাইৰাছৰ ক্ষেত্ৰত ভাৰতে বিশ্বৰ ভিতৰত এক নম্বৰ স্থান দখল কৰিছে, অৰ্থাৎ ভাৰতে মোবাইলত ভাইৰাছ ইনষ্টল কৰাৰ বাবে হেকাৰৰ প্ৰথম পছন্দ হিচাপে পৰিগণিত হৈছে। এই কথা দাবী কৰা হৈছে এক নতুন প্ৰতিবেদনত য’ত কোৱা হৈছে যে ভাৰত মোবাইল ভাইৰাছৰ আটাইতকৈ বেছি বলি হৈছে। এই ক্ষেত্ৰত আমেৰিকা আৰু কানাডাৰ পৰিস্থিতি ভাল। বিগত বছৰ এই বিষয়ত ভাৰত তৃতীয় স্থানত আছিল।
Zscaler ThreatLabz 2024 মোবাইল, IoT, আৰু OT :
Zscaler ThreatLabz 2024 Mobile, IoT, আৰু OT Threat Report অনুসৰি, ২০২৩ চনৰ জুন আৰু ২০২৪ চনৰ মে’ৰ ভিতৰত ২০ বিলিয়নতকৈ অধিক মোবাইল লেনদেন আৰু আনুষংগিক চাইবাৰ ভাবুকি বিশ্লেষণ কৰা হৈছিল। প্ৰতিবেদনত কোৱা হৈছে যে ভাৰতে মুঠ মোবাইল মেলৱেৰ আক্ৰমণৰ ২৮ শতাংশৰ সৈতে আগবাঢ়ি আছে, তাৰ পিছতে আছে আমেৰিকা (২৭.৩ শতাংশ) আৰু কানাডা (১৫.৯ শতাংশ)।
বিত্তীয় খণ্ডত বৃদ্ধি পোৱা আক্ৰমণ :
প্ৰতিবেদন অনুসৰি ভাৰতত মোবাইল মেলৱেৰ আক্ৰমণৰ সৰ্বাধিক অংশ হৈছে ট্ৰ’জান আক্ৰমণ, যিয়ে ব্যৱহাৰকাৰীক বিপথে পৰিচালিত কৰি ক্ষতিকাৰক চফট্ ৱেৰ ডাউনলোড কৰি চলাবলৈ বাধ্য কৰে। বেংকিং মেলৱেৰ আক্ৰমণ ২৯ শতাংশ বৃদ্ধি পাইছে, মোবাইল স্পাইৱেৰ আক্ৰমণ আচৰিত ধৰণে ১১১ শতাংশ বৃদ্ধি পাইছে।
প্ৰতিবেদনত উল্লেখ কৰিছে যে বেছিভাগ বিত্তীয় চাইবাৰ আক্ৰমণে মাল্টিফেক্টৰ প্ৰমাণীকৰণ (MFA) বাইপাছ কৰে আৰু প্ৰায়ে ফিছিঙৰ দৰে পদ্ধতি ব্যৱহাৰ কৰে। ভুৱা লগইন পেজ, ছ’চিয়েল মিডিয়া চাইট আৰু ক্ৰিপ্টো ৱালেট আদি কৌশল ব্যৱহাৰ কৰি ভাৰতীয় বেংকৰ গ্ৰাহকক টাৰ্গেট কৰা হৈছে।
ভুৱা ৱেবছাইট আৰু এছএমএছৰ জৰিয়তে জালিয়াতি :
ভাৰতীয় ডাক সেৱাও চাইবাৰ অপৰাধীৰ লক্ষ্য হৈ পৰিছে। ভুৱা এছএমএছ বাৰ্তাৰ জৰিয়তে ব্যৱহাৰকাৰীক ফিছিং চাইটলৈ প্ৰলোভিত কৰে । ব্যৱহাৰকাৰীসকলক তেওঁলোকৰ ক্ৰেডিট কাৰ্ডৰ তথ্য বিচৰে ।
“পেকেজ উপলব্ধ” আৰু “ডেলিভাৰী ঠিকনা অসম্পূৰ্ণ”ৰ দৰে অজুহাত দেখুৱাই খৰখেদাতাৰ পৰিৱেশৰ সৃষ্টি কৰে সেইবোৰ ফিছিং চাইটে।
সেয়েহে সাৱধান! এনেকুৱা লিংকত ক্লিক কৰক বা SMS ত লিংক আহিলে ক্লিক নকৰিব। টকা-পইচাৰ লেনদেনৰ ক্ষেত্ৰতো সাৱধান হ'ব। অনলাইন বস্তু কিনা আৰু UPI ৰ ব্যৱহাৰতো সাৱধানতা অৱলম্বন কৰিব। পাচৱৰ্ড সলনি কৰি থাকিব।
