আপোনাৰো হজমৰ সমস্যা হ'য় নেকি? প্ৰায়ে পেট ফুলি উঠে নেকি? এইয়া কোনো গুৰুতৰ ৰোগ হ'ব পাৰে !
( অপূৰ্ব দাস )
খাদ্যাভ্যাসৰ বিসংগতিৰ বাবে বহুতো স্বাস্থ্যজনিত সমস্যাৰ আশংকা বৃদ্ধি পায়। পেট ফুলা তেনে এটা সাধাৰণ সমস্যা। এই পৰিস্থিতি যথেষ্ট অস্বস্তিকৰ হ’ব পাৰে। পেট ফুলাৰ বাবে পেট কঠিন বা ভৰ্তি হৈ থাকে আৰু কেতিয়াবা ইয়াৰ ফলত পেটৰ বিষো হ’ব পাৰে। কিছুমান পৰিস্থিতিত পেট ফুলা নহ’লেও এনে অনুভৱ হ’ব পাৰে।
সাধাৰণতে পেট ফুলাটো পাচনতন্ত্ৰৰ সমস্যা যদিও কিছুমান পৰিস্থিতিত হৰম’নৰ ভাৰসাম্যহীনতা আৰু মানসিক চাপেও এই সমস্যাৰ সৃষ্টি কৰিব পাৰে। যিসকল লোকৰ সঘনাই পেট ফুলাৰ সমস্যা হয় তেওঁলোকে চিকিৎসকৰ পৰামৰ্শ ল’ব লাগে, বহু ক্ষেত্ৰত ই গুৰুতৰ অন্তৰ্নিহিত স্বাস্থ্যজনিত সমস্যাৰ লক্ষণো হ’ব পাৰে যাৰ সময়মতে চিকিৎসা কৰিব লাগে।
পেট ফুলাৰ সমস্যাৰ বিষয়ে জানিবলৈ পঢ়িব -
স্বাস্থ্য বিশেষজ্ঞসকলে কয় যে পেট ফুলাৰ লগতে বিষ হোৱাৰ আটাইতকৈ সাধাৰণ কাৰণ হ’ল অন্ত্ৰত অত্যধিক গেছ। যদি খাদ্য খোৱাৰ পিছত পেট ফুলি উঠে তেন্তে ই পাচনতন্ত্ৰৰ সমস্যা হ’ব পাৰে। ইয়াৰ উপৰিও ঋতুচক্ৰৰ বাবে মহিলাৰ ক্ষেত্ৰতো সাময়িকভাৱে ফুলাৰ সমস্যা দেখা যায়। কেতিয়াবা পেট ফুলাটোও অধিক গুৰুতৰ চিকিৎসাজনিত অৱস্থাৰ লক্ষণ হ’ব পাৰে।
এই সমস্যা প্ৰায়ে ইৰিটেবল বাৱেল চিণ্ড্ৰম (IBS) ৰোগত আক্ৰান্ত লোকৰ ক্ষেত্ৰত দেখা যায়। ৭৫% পৰ্যন্ত মহিলাৰ মাহেকীয়াৰ আগতে আৰু মাহেকীয়াৰ সময়ত পেট ফুলাৰ সমস্যা থাকে। এই IBS ৰোগত আক্ৰান্ত হৈ থাকিলে আগলৈ পাইলচ ( কেচুমূৰীয়া ) ৰোগ হয়।
পেট ফুলাৰ সমস্যা :
স্বাস্থ্য বিশেষজ্ঞসকলে কয় যে সাধাৰণতে খাদ্যাভ্যাসত অসুবিধা হোৱাটোৱেই পেট ফুলাৰ প্ৰধান কাৰণ।
কছু, মূলা, পিয়াঁজ , বুট, কেঁচা পাচলি, কল , বীন, কবি, ব্ৰকলি আৰু কাৰ্বনেটেড পানীয়ৰ দৰে গেছ গঠনকাৰী খাদ্য অত্যধিক সেৱনৰ বাবে আপোনাৰ পেট ফুলাৰ সমস্যা হয়। লেক্ট’জ অসহিষ্ণুতা থকা লোকসকলে গাখীৰ, পনিৰ বা আইচক্ৰীম খোৱাৰ পিছত ফুলা অনুভৱ কৰিব পাৰে। খৰধৰকৈ খোৱাৰ অভ্যাস, ভজা খাদ্য বেছিকৈ খোৱা বা খোৱাৰ লগে লগে শুৱাৰ অভ্যাসেও পেট ফুলাৰ সমস্যা বৃদ্ধি কৰিব পাৰে।
এয়া কোনো গুৰুতৰ ৰোগৰ লক্ষণ নেকি?
সাধাৰণতে পেট ফুলা ৰোগক বৰ গুৰুতৰ বুলি গণ্য কৰা নহয় আৰু সাধাৰণ ঔষধ আৰু ঘৰুৱা উপায়েৰে আৰোগ্য কৰিব পাৰি। কিন্তু যদি আপোনাৰ এই সমস্যা সঘনাই হয়, তেন্তে সম্ভৱ যে ই কোনো গুৰুতৰ ৰোগৰ লক্ষণো হ’ব পাৰে।
লেহেমীয়া হজম প্ৰক্ৰিয়া , IBS বা কোষ্ঠকাঠিন্য হোৱাৰ বাবে খাদ্য সঠিকভাৱে হজম নহয়, যাৰ বাবে গেছ গঠন হয়, ইয়াৰ কাৰণ জানিবলৈ চিকিৎসকৰ পৰামৰ্শ লওক।
যদি এই সমস্যা ইৰিটেবল বাৱেল চিণ্ড্ৰম (IBS)ৰ বাবে হয়, তেন্তে সময়মতে ইয়াৰ চিকিৎসা কৰাটো অতি গুৰুত্বপূৰ্ণ হৈ পৰে। নহ'লে আগলৈ পাইলচ ৰোগ হয়।
ঋতুস্ৰাৱৰ সময়ত হৰম’নৰ পৰিৱৰ্তনৰ বাবে মহিলাসকলে পেট ফুলা ৰোগত ভুগিব পাৰে।
থাইৰয়ডৰ সমস্যা (হাইপ’থাইৰয়ডিজম)ৰ ফলত বিপাকীয় ক্ৰিয়া লেহেমীয়া হয়, যাৰ ফলত হজম শক্তিত প্ৰভাৱ পৰে।
চিলিয়াক ৰোগ, পাচনতন্ত্ৰত টিউমাৰ আৰু কিছুমান প্ৰকাৰৰ কৰ্কট ৰোগৰ বাবেও এই সমস্যা থাকিব পাৰে।
এই সমস্যা কেনেকৈ প্ৰতিৰোধ কৰিব পাৰি?
পেট ফুলাৰ সমস্যাৰ পৰা হাত সাৰিবলৈ খাদ্যাভ্যাসৰ উন্নতি অতি প্ৰয়োজনীয়। আদা, সৈন্ধৱ লৱন, কলৰ ক্ষাৰ , অমিতা, তেঙা নোহোৱা দৈ আদি কম গেছ উৎপন্ন হোৱা এনে বস্তু সেৱন কৰক। ইয়াৰ বাহিৰেও খাদ্য লাহে লাহে খাব আৰু চোবাই খাব লাগে।
যদি আপোনাৰ গাখীৰ আৰু গ্লুটেনযুক্ত বস্তু খালে সমস্যা বাঢ়ে তেন্তে ইয়াক সেৱন নকৰিব। দৈ আৰু মাখনৰ দৰে প্ৰ’বায়’টিক যুক্ত খাদ্যই আন্ত্ৰিক বেক্টেৰিয়াক সুস্থ বেক্টেৰিয়া বৃদ্ধি কৰে, যাৰ ফলত হজম শক্তি উন্নত হয় আৰু পেট ফুলাৰ সম্ভাৱনা কম হয়। ইয়াৰ লগতে ৰাতিপুৱা আৰু খাদ্য খোৱাৰ এক দুই ঘণ্টা আগত অধিক পানী খোৱাটোও আপোনাৰ হজম শক্তিৰ বাবে গুৰুত্বপূৰ্ণ। নিয়মীয়া ব্যায়ামৰ সহায়তো পেটৰ সমস্যাৰ পৰা হাত সাৰিব পাৰি।
যদি আপোনাৰ পেট ফুলাৰ স্থায়ী সমস্যা আছে, তেজ বা ক’লা ৰঙৰ মল বা বমি হয় বা পেটত সঘনাই বিষ হয়, তেন্তে ই অধিক ভয়ংকৰ। অতি সোনকালে চিকিৎসকৰ পৰামৰ্শ লোৱাটো অতি প্ৰয়োজনীয়।
