By Good Assam
যদি আপোনাৰো বাৰে বাৰে গেছ থাকে, তেন্তে ই শৰীৰৰ ভিতৰত বহুতো আভ্যন্তৰীণ ৰোগৰ লক্ষণ হ’ব পাৰে। এনে পৰিস্থিতিত খাদ্যত কিছুমান বিশেষ বস্তু অন্তৰ্ভুক্ত কৰিলে এই ৰোগৰ আশংকা হ্ৰাস পাব পাৰে।
পেটত গেছৰ সমস্যা অতি সাধাৰণ যদিও ই যথেষ্ট অস্বস্তিকৰ আৰু বিৰক্তিকৰ হ’ব পাৰে। পেটত গেছ গঠন হ’লে প্ৰায়ে গধুৰতা, বিষ, ফুলা আৰু কোষ্ঠকাঠিন্য আদি সমস্যাৰ সৃষ্টি হয়। দৰাচলতে সাধাৰণতে পাচনতন্ত্ৰত বিঘিনি ঘটাৰ বাবেই পেটত গেছ গঠনৰ সমস্যাৰ সৃষ্টি হয়। যেতিয়া শৰীৰে খাদ্য সঠিকভাৱে হজম কৰিব নোৱাৰে তেতিয়া গেছ উৎপন্ন হয়। ইয়াৰ কাৰণ বেছিভাগেই খাদ্যত অতিৰিক্ত আঁহ, চেনি বা তেল বা দ্ৰুত খাদ্যাভ্যাস আদিৰ ব্যৱহাৰ। কিছুমান খাদ্য যেনে বীন, ব্ৰকলি, পকা কল, অধিক জ্বলা, টেঙা খাদ্য, মদ বা দুগ্ধজাত সামগ্ৰীয়ে গেছ বৃদ্ধি কৰিব পাৰে। ইয়াৰ উপৰিও অত্যধিক মানসিক চাপ, উদ্বেগ বা ভুল জীৱনশৈলীয়েও গেছ উৎপাদন বৃদ্ধি কৰে। পাচন প্ৰক্ৰিয়াৰ সময়ত উৎপন্ন হোৱা গেছে পেট ফুলা আৰু অস্বস্তিৰ সৃষ্টি কৰিব পাৰে। কিন্তু আপুনি জানেনে যে এই সমস্যাৰ পৰা সোনকালে সকাহ পাবলৈ আপুনি কিছুমান ঘৰুৱা উপায় গ্ৰহণ কৰিব পাৰে, যিয়ে আপোনাক গেছৰ সমস্যাৰ পৰা মুক্তি পোৱাত সহায় কৰিব পাৰে।
১) আদা
গেছ আৰু পেট ফুলাকে ধৰি বহুতো পেটৰ সমস্যাৰ বাবে আদা উপকাৰী। ই হজম শক্তিক উদ্দীপিত কৰে আৰু গেছ বাহিৰ কৰাত সহায় কৰে। পেটত গেছ গঠন হ’লে সতেজ আদা এটুকুৰা সৈন্ধৱ লৱনৰ সৈতে চোবাই বা আদাৰ চাহ বনাই খাব পাৰে।
২) পদিনা
পদিনাই পেট ঠাণ্ডা কৰি শান্তি প্ৰদান কৰে। লগতে পদিনা পেটৰ বাবে প্ৰাকৃতিক এন্টি-ইনফ্লেমেটৰী আৰু গেছ, বদহজম আৰু পেট ফুলা কমায়। পদিনা পাতৰ ৰস এচামুচ ঘীউৰ লগত খালে বা পদিনাৰ পাত উতলি কৰা পানী খালে পেটৰ গেছ সোনকালে বাহিৰ হয়।
৩) জিৰা
হজম শক্তিৰ বাবে জিৰা অতি উপকাৰী। ই পেটৰ টেঙা ৰসৰ ভাৰসাম্য ৰক্ষা কৰি গেছ বাহিৰ কৰাত সহায় কৰে। জিৰা পানী বনাবলৈ এচামুচ জিৰা গুটি গৰম পানীত উতলাই তাৰ পিছত পুৱা খালি পেটত পান কৰক। ই পেটৰ সমস্যা শান্ত কৰাত সহায় কৰে আৰু হজম শক্তি উন্নত কৰে।
৪/ পকা অমিতা
পকা অমিতা সেৱন কৰিলেও গেছৰ সমস্যাৰ পৰা সকাহ পাব পাৰি। আচলতে অমিতাত পেপেইন নামৰ ক্ষাৰ এনজাইম থাকে, যিয়ে হজম শক্তি উন্নত কৰে আৰু গেছ বাহিৰ কৰাত সহায় কৰে। কেঁচা অমিতাৰ ৰস খালেও কষ্ঠকাঠিন্য , বদহজম, গেছ আদিৰ পৰা সকাহ পোৱা যায়।
৫) গেছৰ সমস্যাত আপেল চাইডাৰ ভিনেগাৰ
আপেল চাইডাৰ ভিনেগাৰে পেটৰ এচিডিটিৰ ভাৰসাম্য ৰক্ষা কৰি পাচন শক্তি উন্নত কৰে। ই গেছৰ সমস্যা হ্ৰাস কৰাত সহায় কৰে। এগিলাচ গৰম পানীত এচামুচ আপেল চাইডাৰ ভিনেগাৰ মিহলাই খালে পেটৰ ফুলা আৰু গেছৰ পৰা সকাহ পোৱা যায়। এই প্ৰাকৃতিক পদ্ধতিয়ে পেটত সকাহ দিয়ে।
সাৱধানতা: কিছুমান পেটৰ গুৰুতৰ ৰোগ যেনে - পাইলচ, অতিসাৰ, লিভাৰৰ সমস্যা, বৃক্কৰ সমস্যা, অগ্নাশয় দুৰ্বল হ'লেও গেছ-গেছট্ৰিকৰ সমস্যা হ'য়। এনে ক্ষেত্ৰত ওপৰত উল্লেখ কৰা ঘৰুৱা উপায় সমূহে কোনো কাম নিদিব। সেয়েহে অভিজ্ঞ চিকিৎসকৰ দ্বাৰা লিভাৰ, বৃক্ক, পাইলচ আদি সমস্যা আছেনে নাই পৰীক্ষা কৰিব ; নহ'লে আগলৈ গুৰুতৰ সমস্যাৰ সৃষ্টি কৰিব।
