By Good Assam
দিল্লী মেট্ৰ’ত উঠা যাত্ৰীসকলে এতিয়া সম্পূৰ্ণ গতিৰ ইণ্টাৰনেট স্পীড লাভ কৰিব আৰু ম’বাইল নেটৱৰ্কো সম্পূৰ্ণৰূপে উপলব্ধ হ’ব। ডিএমআৰচিয়ে মেট্ৰ’ পথত দ্ৰুতবেগী ইন্টাৰনেটৰ বাবে চুক্তি স্বাক্ষৰ কৰিছে।
এই প্ৰকল্পৰ অধীনত সকলো মেট্ৰ’ কৰিডৰত দ্ৰুতবেগী অপটিকেল ফাইবাৰ নেটৱৰ্ক স্থাপন কৰা হ’ব আৰু ইয়াৰ উন্নতি কৰা হ’ব।
এই পদক্ষেপে দিল্লী-এনচিআৰ মেট্ৰ’ নেটৱৰ্কত ইণ্টাৰনেট সংযোগৰ উন্নতি সাধন কৰিব। এই সন্দৰ্ভত ডি এম আৰ চিয়ে তথ্য দিছে। ডিএমআৰচিয়ে জনাইছে যে এই প্ৰকল্পৰ প্ৰথম পৰ্যায়ত বিমানবন্দৰ লাইনকে ধৰি সকলো মেট্ৰ’ লাইনত ৭০০ কিলোমিটাৰ ফাইবাৰ অপটিক কেবল স্থাপন কৰিব। পিংক আৰু মেজেন্টা লাইনৰ যাত্ৰীসকলে প্ৰথমে এই সুবিধা লাভ কৰিব। ইয়াৰ পিছত বাকী থকা কামসমূহ আগন্তুক ৬ মাহত সাজু হোৱাৰ সম্ভাৱনা আছে।
ফাইবাৰ নেটৱৰ্ক হাই-স্পীড ইণ্টাৰনেটৰ সুবিধা উপলব্ধ হোৱাৰ লগে লগে দিল্লী আৰু ইয়াৰ আশে-পাশে থকা অঞ্চলত ৫জি সেৱা সুকলমে মুকলি কৰা হ’ব।
মেট্ৰ’ত যাত্ৰা কৰা যাত্ৰীসকলে ভিডিঅ’ চোৱা, ম’বাইলত কথা পতা আৰু লেপটপত গুৰুত্বপূৰ্ণ কাম সম্পূৰ্ণ কৰাৰ সময়ত ইণ্টাৰনেটৰ গতিৰ সমস্যাৰ সন্মুখীন হয়। বহু সময়ত নেটৱৰ্কৰ অভাৱত হঠাতে কথা পাতি থাকোঁতে ফোনটো বিচ্ছিন্ন হৈ পৰে।
