( অপূৰ্ব দাস )
Mobile, Laptop, Computer স্ক্ৰীণৰ সময় বৃদ্ধি কৰাটো বৰ্তমান আমাৰ স্বাস্থ্যৰ বাবে অন্যতম ডাঙৰ সমস্যা হৈ পৰিছে। শিশুৰ পৰা বৃদ্ধলৈকে সকলোৱে ইয়াৰ বলি হৈছে।
স্বাস্থ্য বিশেষজ্ঞসকলে কয় যে ৰিল স্ক্ৰল কৰা, ভিডিঅ’ চোৱা বা মোবাইল ফোনত গেম খেলাৰ অভ্যাসৰ বাবে মানুহ প্ৰায়ে বহি বা শুই থাকে। এইদৰে শাৰীৰিক নিষ্ক্ৰিয়তা বৃদ্ধিৰ বাবে মেদবহুলতা, ডায়েবেটিছ, ৰক্তচাপ আৰু হৃদৰোগৰ আশংকা কম বয়সতো দেখা পোৱা গৈছে।
মগজুৰ স্বাস্থ্য আৰু অন্যান্য শাৰীৰিক-মানসিক স্বাস্থ্যজনিত সমস্যাৰ বাবেও স্ক্ৰীণ টাইম দায়ী বুলি বিবেচিত হৈছে। এই কাৰণেই স্বাস্থ্য বিশেষজ্ঞসকলে সকলো লোককে মোবাইল বা আন যিকোনো ডিজিটেল স্ক্ৰীণৰ পৰা দূৰত্ব বজাই ৰাখিবলৈ পৰামৰ্শ দি আহিছে।
মাইঅ’পিয়া ৰোগ :
মাইঅ’পিয়া, যাক ওচৰৰ বস্তুবোৰ স্পষ্টকৈ দেখা যায় যদিও দূৰৈৰ বস্তুবোৰ দেখাত অসুবিধা হয়। অধ্যয়নত প্ৰকাশ পাইছে যে যোৱা ৩০ বছৰত শিশু আৰু কিশোৰ-কিশোৰীৰ মাইঅ’পিয়াৰ প্ৰাদুৰ্ভাৱ যথেষ্ট বৃদ্ধি পাইছে। ১৯৯০ চনত ইয়াৰ মুঠ ৰোগীৰ সংখ্যা আছিল ২৪ শতাংশ, যিটো ২০২৩ চনত ৩৬ শতাংশলৈ বৃদ্ধি পাইছে।
চকুৰ চিকিৎসকৰ মতে, মোবাইল, লেপটোপ স্ক্ৰীণ টাইমৰ ফলত শিশু আৰু যুৱক-যুৱতীসকলৰ মাইঅ’পিয়াৰ সম্ভাৱনা পূৰ্বতকৈ বহু বেছি বৃদ্ধি পায়।
অধ্যয়নত কি পোৱা গৈছে ?
শেহতীয়াকৈ জামা নেটৱৰ্ক অ’পেন জাৰ্নেলত প্ৰকাশিত এক অধ্যয়নৰ প্ৰতিবেদনত কোৱা হৈছে যে যিসকল লোকে দৈনিক ২ ঘণ্টাৰো অধিক সময় মোবাইল , লেপটোপ, কম্পিউটাৰৰ পৰ্দা চাই থাকে তেওঁলোকৰ বয়সৰ লগে লগে এই ৰোগ হোৱাৰ সম্ভাৱনা ২১ শতাংশ বৃদ্ধি পায়।
ইয়াৰ বাবে গৱেষকসকলে ৪৫ টা ভিন্ন অধ্যয়ন বিশ্লেষণ কৰিছিল। শিশুৰ পৰা প্ৰাপ্তবয়স্কলৈকে ৩ লাখ ৩৫ হাজাৰতকৈ অধিক অংশগ্ৰহণকাৰীক ইয়াত অন্তৰ্ভুক্ত কৰা হৈছিল। এই অধ্যায়ন এঘণ্টাৰ পৰা চাৰি ঘণ্টা ধৰি পৰ্দাৰ সংস্পৰ্শলৈ আহিলে মাইঅ’পিয়া মেনিফল্ডৰ সম্ভাৱনা বৃদ্ধি পায় বুলি নিশ্চিত হ'য়।
ইয়াৰ পূৰ্বে ব্ৰিটিছ জাৰ্নেল অৱ অফথালম’লজীত প্ৰকাশিত এক অধ্যয়নত কোৱা হৈছে যে বিশ্বৰ প্ৰতি তিনিজন শিশুৰ ভিতৰত এজনৰ মাইঅ’পিয়া ধৰা পৰিছে। যদি এই ৰোগৰ বৃদ্ধিৰ হাৰ এনেদৰে অব্যাহত থাকে আৰু প্ৰতিৰোধৰ ব্যৱস্থা গ্ৰহণ কৰা নহয়, তেন্তে আগন্তুক ২৫ বছৰত এই সমস্যাই বিশ্বৰ লাখ লাখ শিশুক আক্ৰান্ত কৰিব পাৰে। প্ৰতিবেদনত ২০৫০ চনৰ ভিতৰত ৪০ শতাংশ শিশু এই চকুৰ সমস্যাৰ বলি হ’ব পাৰে বুলি কোৱা হৈছে।
ক’ৰ’না মহামাৰীৰ নেতিবাচক পৰিস্থিতি যেনে মানুহে ঘৰতে অধিক সময় কটোৱা, বাহিৰৰ খেল আৰু অনলাইন ক্লাছৰ অভাৱৰ বাবে এই চকুৰ লগত জড়িত ৰোগৰ ৰোগী আৰু অধিক বৃদ্ধি পাইছে।
ইলেকট্ৰনিক পৰ্দাৰ সময় বৃদ্ধিৰ আৰু বহুতো অসুবিধা :
• চকুৰ বিশেষজ্ঞসকলে কয় যে, পৰ্দাৰ সময় বৃদ্ধি কৰিলে আন বহুতো গুৰুতৰ প্ৰভাৱ পৰিব পাৰে।
• বহু সময় পৰ্দাৰ সন্মুখত থকাৰ বাবে জ্বলা-পোৰা, খজুৱতি, দৃষ্টিশক্তি ম্লান হোৱা আৰু চকুৰ বিষৰ দৰে সমস্যা বাঢ়ি যায়।
• অহৰহ পৰ্দাত সময় কটালে মনোযোগ দিয়াৰ ক্ষমতা হ্ৰাস পায়।
• ছ’চিয়েল মিডিয়া আৰু ভিডিঅ’ গেম আদিত অধিক সময় কটালেও অত্যধিক খিংখিঙীয়া আৰু খং আদি আৱেগিক অস্থিৰতাৰ দৰে সমস্যাৰ সৃষ্টি হয়।
• পৰ্দাৰ পৰা নিৰ্গত হোৱা নীলা পোহৰে টোপনিৰ চক্ৰ নিয়ন্ত্ৰণৰ বাবে প্ৰয়োজনীয় মেলাটনিন নামৰ হৰম’নৰ উৎপাদনত ব্যাঘাত জন্মায়।
