( অপূৰ্ব দাস )
এই সময়ত ঔটেঙা খাবলৈ মিঠা। পকা ঔটেঙাৰ গোন্ধেৰে এসাঁজ খাই চাবচোন, বহুত তৃপ্তি লাভ কৰিব।
ঔটেঙাৰ বহুতো ঔষধি গুণ আছে , যেনে-
(১) ৰোগ প্ৰতিৰোধ ক্ষমতা বৃদ্ধি কৰে,
(২) জণ্ডিছ ৰোগ দূৰ কৰে,
(৩) ডায়েবেটিচ ৰোগীৰ বাবে মহৌষধ,
(৪) ছাল-চুলিৰ উজ্বলতা বৃদ্ধি কৰে,
(৫) প্ৰস্ৰাৱ জ্বলা-পোৱা কৰা ৰোগ দূৰ কৰে।
(৬) উচ্চ ৰক্তচাপ কম কৰে।
আজি আপোনালোকক জনাম এটি নতুন পদ্ধতিৰে ঔটেঙা মাছৰ আঞ্জা।
এই আঞ্জাখন ৰান্ধিবলৈ প্ৰাথমিক বিদ্যালয়ত পোৱা দাইল-খিচিড়িৰ এক-দুই মুঠি, এটা বেঙেনা, ২ টা মূলা, এটা বা দুটা ওলকবি, ২-৩ টা বিলাহী, আলু ৩-৪ টা , মাছ , নহৰু, পিয়াঁজ, আদা, হালধি, মিঠা তেল, বগা তিল, কেঁচা জলকীয়া, নিমখ , জিৰা ইত্যাদি ।
ৰন্ধন প্ৰণালী: প্ৰথমে ঔটেঙাৰ কাটি ভালদৰে ধুই খুন্দি ল'ব।
মাছকেইটা ভাজি ল'ব। এতিয়া পাচলিবোৰ ভালদৰে ধুই ওলকবি, মূলা একেবাৰে মিহিকৈ কুটিব। ইয়াৰ পিছত আলু আৰু বেঙেনা দুই-তিনি ফাল হোৱা কৈ কুটিব। আদা-নহৰু পিহি ল'ব। পিয়াঁজ কাটি ল'ব।
জুইত কেৰাহীখন গৰম হ'বলৈ দিব। তেলত পিয়াঁজ আদা জলকীয়া দি ৰঙচুৱাকৈ ভাজিব। এতিয়া পাচলিখিনিও দি কিছু সময় ৰঙচুৱাকৈ ভাজিব। ভজা হ'লে গৰম পানী জোখমতে দিব। উতল আহিলে দাইল-খিচিড়িৰ এক-দুই মুঠি দিব, লগতে হালধি আৰু নিমখ দিব। ভালদৰে সিজিলে আদা-নহৰু পিহা, মচলা আৰু ভজা মাছকেইটা দিব। আলু বা পাচলি হেতাৰে কিছু ভাঙি দিব। এচামুচ ঘী দিলে বেছি সোৱাদ হ'য়। সিজি থপথপীয়া হ'লে নমাই থৈ কিছু ঠাণ্ডা হ'বলৈ দিব। ধনিয়াৰ পাতেৰে সজাই ভাত বা ৰুটিৰ লগত খাই মজা পাব।
