( অপূৰ্ব দাস )
বেটাৰীৰ দুৰ্বল কাৰ্য্যক্ষমতা বা সোনকালে বেয়া হোৱাটো আমাৰ ব্যৱহাৰৰ অভ্যাস আৰু কাৰিকৰী সীমাবদ্ধতাকে ধৰি বিভিন্ন কাৰকৰ বাবে হ’ব পাৰে। বেটাৰী কিয় বেয়া হয় সেয়া বুজাটো গুৰুত্বপূৰ্ণ। জানিবলৈ পঢ়িব -
স্মাৰ্টফোন আজি আমাৰ জীৱনৰ এক গুৰুত্বপূৰ্ণ অংগ হৈ পৰিছে । ইয়াৰ বেটাৰীৰ সমস্যা প্ৰায়ে বিপদৰ কাৰণ হৈ পৰে। বেটাৰীৰ দুৰ্বল কাৰ্য্যক্ষমতা বা সোনকালে বেয়া হোৱাটো আমাৰ ব্যৱহাৰৰ অভ্যাস আৰু কাৰিকৰী সীমাবদ্ধতাকে ধৰি বিভিন্ন কাৰকৰ বাবে হ’ব পাৰে। বেটাৰী কিয় বেয়া হয় সেয়া বুজাটো গুৰুত্বপূৰ্ণ, যাতে সঠিক যত্ন ল’লে ইয়াক দীৰ্ঘদিনলৈ ব্যৱহাৰ কৰিব পৰা যায়। ইয়াৰ মূল কাৰণবোৰ জানো আহক -
• বেটাৰী অতিমাত্ৰা উত্তাপ
বেটাৰীটো অত্যধিক তাপৰ সন্মুখীন হ’লে ইয়াৰ চাপ বৃদ্ধি পায় আৰু ইয়াৰ আয়ুস হ্ৰাস পায় । এইটো ইমানেই বিপজ্জনক যে ইয়াৰ ফলত বেটাৰীটো বিস্ফোৰণ হৈ জুই জ্বলি উঠে আৰু আপোনাৰ বিপদ হ'ব পাৰে । বেছিকৈ ঘণ্টা ধৰি গেম খেলা, বাৰে বাৰে চাৰ্জ কৰা আৰু একে সময়তে দ্ৰুত চাৰ্জিঙৰ সময়ত বেটাৰীটো অতিমাত্ৰা গৰম হৈ পৰে, যাৰ ফলত ইয়াৰ আয়ুস কম হ’য় ।
• অত্যধিক চাৰ্জিং
বাৰে বাৰে ফোনটো চাৰ্জ কৰিলে ইয়াৰ বেটাৰীত চাপ পৰে। গতিকে বেটাৰী চাৰ্জ হোৱাৰ পিছত চাৰ্জাৰটো আঁতৰাই পেলোৱাটো ভাল। বিশেষজ্ঞসকলে বেটাৰী ১০০ শতাংশ চাৰ্জ কৰাৰ পৰিৱৰ্তে ৯৫ শতাংশ পৰ্যন্ত চাৰ্জ কৰিবলৈ পৰামৰ্শ দিয়ে। একে সময়তে বেটাৰী সঘনাই চাৰ্জ কৰাটোও এৰাই চলিব লাগে।
• চাৰ্জাৰৰ পছন্দ
ফোনটো সোনকালে চাৰ্জ কৰিবলৈ আমি প্ৰায়ে অধিক ভল্টৰ চাৰ্জাৰ ব্যৱহাৰ কৰাৰ কথা ভাবো। কিন্তু এইটোও যথেষ্ট বিপদজনক । ইয়াৰ ফলত বেটাৰীত চাপ পৰে আৰু ক্ষতি হ’ব পাৰে। গতিকে নিৰ্দিষ্ট ফোনটোৰ বাবে ডিজাইন কৰা চাৰ্জাৰহে ব্যৱহাৰ কৰক।
• বেটাৰী শেষ নোহোৱালৈকে ব্যৱহাৰ কৰা আৰু একাধিক এপ ব্যৱহাৰ কৰা বেয়া
বেটাৰী সম্পূৰ্ণৰূপে শেষ হোৱালৈকে চলালে ইয়াৰ আয়ুস হ্ৰাস পায় বা কমি যায়। বেটাৰী ২০-৫০%ৰ ভিতৰত ৰখাটো ভাল। অত্যধিক এপ চলালে বেটাৰী দ্ৰুতভাৱে শেষ হ’ব পাৰে, বিশেষকৈ যেতিয়া এপসমূহ বেকগ্ৰাউণ্ডত চলি থাকে। আচলতে এপৰ অত্যধিক ব্যৱহাৰে স্মাৰ্টফোনত অধিক পাৰফৰমেন্স চাপৰ সৃষ্টি কৰে, যাৰ ফলত বেটাৰীৰ জীৱনকালো হ্ৰাস পায়। এনে পৰিস্থিতিত প্ৰয়োজন নহ’লে বেকগ্ৰাউণ্ড এপ বন্ধ কৰিব লাগে।
• ফোনটো বেছি ঠাণ্ডা ঠাইত থলে
ফোনটো বেছি গৰম হ’লে কেতিয়াবা ফ্ৰীজত ৰখাৰ চিন্তা আমাৰ মনলৈ আহে। কিন্তু ইয়াৰ ফলত ফোনটোৰ বেটাৰীৰ ক্ষতি হ’য়। অৱশ্যে ফেনৰ তলত থব পাৰে।
• বহু সময় পেকেটত লৈ থাকিলে
বাহিৰলৈ গলে আমি পকেটত মোবাইলটো বহু সময় ধৰি ভৰাই লৈ থাকো। লগতে টাইট লংপেন্টত মোবাইল ফোনটো ভৰাই লোৱা উচিত নহয়। কিয়নো এনে কৰিলে মোবাইল ফোনটো গৰম হোৱাৰ লগতে ইয়াত চাপ পৰে। ইয়াৰ ফলত বেটাৰীটো বিস্ফোৰণ হ'য় বা ক্ষতি হ'বলৈ আৰম্ভ কৰে।
