( অপূৰ্ব দাস )
স্বাস্থ্য সম্পৰ্কীয় বহু সমস্যাৰ সমাধান পানীত লুকাই আছে। সুস্বাস্থ্যৰ বাবে পানী খোৱাটো অতি প্ৰয়োজনীয়। শৰীৰত পৰ্যাপ্ত পৰিমাণৰ পানী খালে শৰীৰৰ সকলো অংগই সুচাৰুৰূপে কাম কৰে। পুৱা শুই উঠিয়েই গৰম পানী খোৱাৰ পৰম্পৰা আমাৰ দেশত বহুদিনৰ পৰাই চলি আহিছে। শেহতীয়া বছৰবোৰত মানুহে ওজন কমোৱাৰ বাবে ৰাতিপুৱা খালী পেটত নেমুৰ লগত মিহলি গৰম পানী খাবলৈ আৰম্ভ কৰিছে। বিশেষজ্ঞসকলৰ মতে ৰাতিপুৱা নেমুৰ লগত মিহলি কুহুমীয়া গৰম পানী খোৱাৰ পৰিৱৰ্তে কেৱল সাধাৰণ গৰম পানী খালে ওজন কমোৱাত সহায়ক হয় যদিও ইয়াৰ আন বহু উপকাৰো আছে।
বিশেষজ্ঞসকলে লগতে কয় যে গৰম পানী খোৱাৰ সময়ত সদায় মনত ৰাখিব যে পানীৰ উষ্ণতা ১২০ ডিগ্ৰী ফাৰেনহাইটতকৈ বেছি হ’ব নালাগে কাৰণ ই মুখৰ ভিতৰৰ ছালৰ কোষবোৰ ধ্বংস কৰিব পাৰে। প্ৰতিদিনে পুৱা গৰম পানী খোৱাৰ ফলত তলত দিয়া ৮ টা উপকাৰ পোৱা যায়।
(১) ওজন কমাবলৈ সহায়ক:
ওজন কমাবলৈ জিমত ঘণ্টাৰ পিছত ঘণ্টা থকা বা ডায়েটিং কৰাৰ থগতে সাধাৰণ গৰম পানী খোৱাটো অধিক উপকাৰী। প্ৰতিদিনে পুৱা মাত্ৰ এগিলাচ গৰম পানী খালে পেটৰ পৰা সকলো ক্ষতিকাৰক বিষাক্ত পদাৰ্থ বাহিৰলৈ ওলাই যায় আৰু পেটটো বহু সময়লৈকে ভৰি থকা অনুভৱ হয়। যাৰ বাবে আপুনি অপ্ৰয়োজনীয়ভাৱে কোনো বস্তু খোৱাৰ পৰা বিৰত থাকে। দৈনিক এনে কৰিলে ওজন সোনকালে কমিবলৈ আৰম্ভ কৰে।
( ২) চাইনাছৰ পৰা সকাহ:
চাইনাছৰ বাবে নাক বন্ধ হোৱা আৰু মূৰৰ বিষৰ সমস্যা বহু দিনলৈকে থাকে। আপুনি জানি আচৰিত হ’ব যে ৰাতিপুৱা এগিলাচ গৰম পানী খালে চাইনাছৰ লক্ষণসমূহ ফলপ্ৰসূভাৱে হ্ৰাস পায় আৰু সোনকালে সকাহ পায়।
(৩) দাঁতৰ বাবে উপকাৰী:
যদি আপুনি প্ৰতিদিনে পুৱা কুহুমীয়া গৰম পানী খোৱাৰ অভ্যাস গঢ়ি তোলে তেন্তে ই আপোনাৰ দাঁতক দীৰ্ঘদিনলৈ সুস্থ কৰি ৰাখিব পাৰে। গৰম পানী খোৱাৰ সময়ত সদায় মনত ৰাখিব লাগে যে পানীৰ উষ্ণতা এনেকুৱা হ’ব লাগে যাতে ই দাঁতৰ আঁলু আৰু ইনামেল (দাঁতৰ ওপৰৰ তৰপ)ৰ কোনো ক্ষতি নকৰে।
(৪) পাচনতন্ত্ৰত সহায়ক:
আপুনিও প্ৰতিদিনে কোষ্ঠকাঠিন্য আৰু বদহজমৰ সমস্যাত অসুবিধা পায় নেকি? যদি হ'য়, তেন্তে বুজি লওক যে এই সহজ সমাধানৰ দ্বাৰা আপোনাৰ সকলো সমস্যা এতিয়া শেষ হৈ যাব। গৰম পানী খালে ৰক্তবাহী নলীবোৰ প্ৰসাৰিত হয় আৰু অন্ত্ৰত তেজৰ সোঁত বৃদ্ধি পায়, যাৰ ফলত পাচনতন্ত্ৰত হজম কৰা কামত সহায় কৰে। ইয়াৰ উপৰিও ৰাতিপুৱা খালী পেটত গৰম পানী খালে মলত্যাগ প্ৰক্ৰিয়াও বহুত সহজ হৈ পৰে।
(৫) বিষাক্ত পদাৰ্থ আঁতৰোৱাত সহায়ক:
গৰম পানী খালে শৰীৰৰ উষ্ণতা বৃদ্ধি পায় যাৰ বাবে পাকস্থলীৰ বেয়া পদাৰ্থ ওলায়। শৰীৰত উপস্থিত থকা ক্ষতিকাৰক বিষাক্ত পদাৰ্থ ঘামৰ জৰিয়তে সহজে নাইকিয়া হয়। সেয়েহে ব্যায়াম কৰা হোৱাৰ পাছত কুহুমীয়া গৰম পানী খোৱা দৰকাৰ । যদি আপুনি নেমুৰ পানী বা কুহুমীয়া পানী খাবলৈ ভাল নাপায় তেন্তে ইয়াৰ পৰিৱৰ্তে গ্ৰীণ টিও খাব পাৰে। গ্ৰীণ টিৰ প্ৰভাৱ গৰম পানীৰ দৰেই।
(৬) বিষৰ পৰা উপশম:
গৰম পানী খোৱাটোৱেও বিষৰ পৰা উপশম পোৱাত সহায় কৰে, বিশেষকৈ যদি আপুনি পেটৰ বিষত ভুগি আছে, তেন্তে গৰম পানীয়ে ফলপ্ৰসূভাৱে বিষ কমায়। বহু সময়ত কম পানী খোৱাৰ ফলত শৰীৰৰ পেশীবোৰ সংকুচিত হয় আৰু আন বহু অংগত বিষ আৰম্ভ হয়। এনে পৰিস্থিতিত গৰম পানী খালে অতি সোনকালে সকাহ পোৱা যায়।
(৭) কোষ্ঠকাঠিন্যৰ পৰা সকাহ:
আজিৰ প্ৰজন্মৰ লোক খাদ্যাভ্যাস আৰু জীৱনশৈলীৰ দুৰ্বলতাৰ বাবে কোষ্ঠকাঠিন্যৰ সমস্যাত অতিশয় অশান্তি পাইছে। প্ৰতিদিনে ৰাতিপুৱা খালী পেটত গৰম পানী খোৱাৰ অভ্যাস কৰিলে ই কোষ্ঠকাঠিন্যৰ পৰাও সকাহ দিয়ে আৰু মলত্যাগ প্ৰক্ৰিয়াটো সহজ হৈ পৰে।
(৮) গেছ আৰু গেছট্ৰিকৰ পৰা সকাহ:
প্ৰতিদিনে ৰাতিপুৱা কুহুমীয়া গৰম পানী খালে গেছ আৰু গেছট্ৰিকৰ পৰা সকাহ পোৱা যায়। এনে অভ্যাস কৰিলে গেছট্ৰিকৰ ঔষধ খোৱাৰ প্ৰয়োজন নহয়। গেছট্ৰিকৰ ঔষধ সেৱন কৰি থাকিলে বৃক্কৰ ক্ষতি হয়।
গতিকে ৰাতিপুৱা শুই উঠিয়েই চাহ বা কফিৰ সলনি এগিলাচ গৰম পানী খাই সুস্থ হৈ থাকক, লগতে ঠাণ্ডাৰ দিনত গা ধুবলৈ কুহুমীয়া গৰম পানী ব্যৱহাৰ কৰি তাত ডেটল মিহলাই লোৱা উচিত। ইয়াৰ ফলত দেহৰ উজ্জ্বলতা বৃদ্ধি পায় আৰু চৰ্দী বা ঠাণ্ডাৰ বীজাণুৰ পৰা বাচি থাকিব পাৰি।
