( অপূৰ্ব দাস )
বাস্তু শাস্ত্ৰত শোৱা কোঠা সঠিক দিশত থকাটো অতি গুৰুত্বপূৰ্ণ বুলি বিবেচিত হয় কাৰণ মানুহৰ প্ৰতিটো দিন কেৱল শোৱা কোঠাৰ পৰাই আৰম্ভ হয় আৰু শেষ হয়। যদি শোৱা কোঠাৰ দিশ সঠিক নহয় বা আপোনাৰ টোপনিৰ দিশ সঠিক নহয় তেন্তে ব্যক্তিজনে বহু সমস্যাৰ সন্মুখীন হ’বলগীয়া হ’ব পাৰে। গতিকে বাস্তুৰ মতে কোন দিশত শুব লাগে জানিবলৈ পঢ়িব।
পৃথিৱীৰ চুম্বকীয় ক্ষেত্ৰৰ দ্বাৰা মানুহৰ শৰীৰ প্ৰভাৱিত হয়, যিটো বিজ্ঞানৰ দ্বাৰা প্ৰমাণিত হৈছে। প্ৰাচীন কালৰ পৰাই ধৰ্মীয় শাস্ত্ৰত মানুহৰ সুখ, সমৃদ্ধি আৰু সুস্বাস্থ্যৰ বাবে বহুতো নিৰ্দেশনাৱলী বৰ্ণনা কৰা হৈছে, যাৰ দ্বাৰা মানুহে বছৰ বছৰ ধৰি সুখী, শান্তিপূৰ্ণ, সুস্থ আৰু মানসিক চাপমুক্ত জীৱন যাপন কৰিব পাৰে। প্ৰায়ে তথ্যৰ অভাৱত মানুহে মূৰটো ভুল দিশত লৈ শুই থাকে, যাৰ বাবে স্বাস্থ্যৰ ক্ষতি , বৌদ্ধিক বিভ্ৰান্তি আৰু মানসিক চাপ অব্যাহত থাকে। মূৰটো পূব দিশত থৈ শুলে একাগ্ৰতা আৰু গভীৰ টোপনিত সহায় কৰে। দক্ষিণ দিশত মূৰ থৈ শুই থকাটো স্বাস্থ্যৰ বাবে উপকাৰী, পশ্চিম দিশত মূৰ কৰি শুই থকাটোৱে ব্যক্তিজনক তীব্ৰ উদ্বেগেৰে আগুৰি ধৰে, উত্তৰ দিশত মূৰ কৰি শুই থকাটো অশুভ বুলি গণ্য কৰা হয়। ইয়াৰ বিষতে তলত বিতংকৈ আলোচনা কৰা হ'ল -
• টোপনিৰ দিশটো ভুল হ’লে মানসিক বিভ্ৰান্তিৰ সৃষ্টি হয় :
এজন ব্যক্তিয়ে জীৱনৰ প্ৰায় এক তৃতীয়াংশ সময় টোপনিতে অৰ্থাৎ শোৱা কোঠাত কটায়, সেয়েহে সুস্বাস্থ্য আৰু মানসিক শক্তি পাবলৈ শোৱা কোঠাটো বাস্তুৰ মতে হোৱাটো গুৰুত্বপূৰ্ণ। যদি আমি বাস্তুৰ কথা অমান্য কৰো তেন্তে অনিদ্ৰা, খিংখিঙীয়া স্বভাৱ, স্বাস্থ্যৰ ক্ষতি, বেয়া সপোন, টকা হেৰুৱা আদি সমস্যাৰ সন্মুখীন হ’বলগীয়া হোৱা দেখা যায় । প্ৰাচীন গ্ৰন্থত টোপনিৰ পদ্ধতিৰ বহু বৰ্ণনা পোৱা যায়, সেই অনুসৰি উত্তৰ আৰু পশ্চিম দিশলৈ মূৰ কৰি শুব নালাগে।
পশ্চিম আৰু উত্তৰ দিশত মূৰ থৈ শুলে কি হয় ?
পশ্চিম দিশলৈ মূৰ থৈ শুলে প্ৰবল চিন্তাৰ সৃষ্টি হয় আৰু উত্তৰ দিশলৈ মূৰ থৈ শুলে বহু ধৰণৰ অসুবিধাৰ সৃষ্টি হয়। শাস্ত্ৰৰ এই মতামত সম্পূৰ্ণ বৈজ্ঞানিক। বিজ্ঞানে পৃথিৱীক এটা ডাঙৰ চুম্বক বুলি গণ্য কৰিছে, যাৰ দুটা মেৰু আছে। উত্তৰ মেৰু আৰু দক্ষিণ মেৰু, মানুহৰ শৰীৰতো চুম্বকীয় শক্তিৰ ভঁৰাল থাকে। মূৰটো উত্তৰ মেৰু আৰু ভৰিক দক্ষিণ মেৰু বুলি ধৰা হয়। সেয়ে উত্তৰ দিশলৈ মূৰ থৈ শুলে একেটা চুম্বকীয় মেৰুৰ বাবে বিকৰ্ষণৰ সৃষ্টি হয়, যাৰ ফলত অনিদ্ৰা , হৃদযন্ত্ৰৰ ৰোগ আৰু মূৰৰ বিষৰ লগতে ৰক্তচাপৰ অনিয়ম বৃদ্ধি পায়।
দক্ষিণ দিশত মূৰ থৈ শুলে কি হয়?
যদি আপুনি মূৰটো দক্ষিণ দিশলৈ লৈ শুই থাকে, তেন্তে চুম্বকীয় নীতি অনুসৰি খাদ্য সঠিকভাৱে হজম হ’ব। আপুনি ভালদৰে টোপনি যাব, টোপনিৰ পিছত আপুনি সুস্থ অনুভৱ কৰিব কাৰণ মেৰু আকৰ্ষণৰ নীতি অনুসৰি দক্ষিণৰ পৰা উত্তৰ দিশলৈ বৈ যোৱা প্ৰবাহ আমাৰ মগজুৰ মাজেৰে প্ৰৱেশ কৰি ভৰিৰ মাজেৰে ওলাই আহিব, যাৰ ফলত ব্যক্তিজনৰ আয়ুস বৃদ্ধি পায়। ধৰ্মশাস্ত্ৰৰ মতে দক্ষিণ দিশৰ অধিপতি যম, মৃত্যুৰ দেৱতা। সেয়েহে মৃত্যুৰ দেৱতা যমৰ ফালে ভৰি থৈ শুই থাকিলে মানুহৰ আয়ুস কমি যায়, যিটো সম্পূৰ্ণৰূপে বিজ্ঞানৰ ওপৰত ভিত্তি কৰি গঢ় লৈ উঠিছে। সেয়েহে দক্ষিণ দিশৰ ফালে ভৰি থৈ শুব নালাগে।
কিয় দক্ষিণ আৰু পূব দিশত মূৰ থৈ শুব লাগে ?
পশ্চিম দিশলৈ মূৰ লৈ শুই থকাটোও উপযুক্ত বুলি গণ্য কৰা নহয় কাৰণ ই শাস্ত্ৰ অনুযায়ী নহয় আৰু পৃথিৱীৰ চুম্বক শক্তিৰ বিৰোধীও। জ্যোতিষৰ মতেও এইটো শুদ্ধ নহয়, জ্যোতিষত পূব দিশৰ অধিপতি সূৰ্য্য, যিটো মূৰৰ গুণক আৰু পশ্চিম দিশৰ প্ৰভু হৈছে শনি, যিটো ভৰিৰ গুণক। সূৰ্য্য আৰু শনি পিতৃ-পুত্ৰ হোৱাৰ পিছতো ইটোৱে সিটোৰ বিপৰীত আৰু শত্ৰু। শনিৰ পশ্চিম দিশলৈ মূৰ লৈ শুই থাকিলে চিন্তা, লোকচান, অসুবিধা, ৰোগ আৰু মগজুৰ লগত জড়িত বিকাৰৰ সৃষ্টি হয়। গতিকে বাস্তু শাস্ত্ৰৰ মতে গভীৰ টোপনি, সুস্বাস্থ্য, একাগ্ৰতাৰ বাবে সদায় দক্ষিণ বা পূব দিশলৈ মূৰ ৰাখি শুব লাগে।
