( অপূৰ্ব দাস )
শীতকালত উপলব্ধ বহুতো শাক-পাচলি ডায়েবেটিছ ৰোগীৰ বাবে ক্ষতিকাৰক বুলি প্ৰমাণিত । ইয়াৰ বিষয়ে তলত আলোচনা কৰা হ'ল।
টাইপ ২ ডায়েবেটিছ আজিৰ দিনত সৰ্বাধিক দ্ৰুতগতিত বিয়পি পৰা ৰোগত পৰিণত হৈছে আৰু ভাৰতত সৰ্বাধিক ডায়েবেটিছ ৰোগী আছে। ডায়েবেটিছ হ’ল ৰোগীৰ শৰীৰত পৰ্যাপ্ত পৰিমাণৰ ইনচুলিন উৎপাদন নোহোৱা অৱস্থা। ইনচুলিনে খাদ্য হজম কৰি শৰীৰৰ পৰা প্ৰয়োজনীয় শক্তি আহৰণ কৰাত সহায় কৰে। কিন্তু, ইনচুলিনৰ অভাৱত খাদ্যৰ পৰা পোৱা গ্লুক’জ তেজত দ্ৰৱীভূত হ’বলৈ আৰম্ভ কৰে আৰু শৰীৰে ইয়াক ব্যৱহাৰ কৰিব নোৱাৰে।
তেজত গ্লুক’জৰ মাত্ৰা অধিক হ’লে আপোনাৰ স্বাস্থ্যৰ ওপৰত নেতিবাচক প্ৰভাৱ পৰিব পাৰে। তেজত চেনিৰ পৰিমাণ বেছি হ’লে শৰীৰৰ অভ্যন্তৰীণ অংগসমূহৰ ক্ষতি হ’য় আৰু ইয়াৰ ফলত আপোনাৰ দৈনন্দিন জীৱনত প্ৰভাৱ পৰিব পাৰে।
তেজৰ চেনিৰ মাত্ৰা বৃদ্ধি হোৱাটো কেনেকৈ ৰোধ কৰিব পাৰি ?
শৰীৰত গ্লুক’জ বা চেনিৰ মাত্ৰা কম কৰিবলৈ প্ৰথমে খাদ্য আৰু জীৱনশৈলী স্বাস্থ্যকৰ কৰি তুলিব লাগিব। দৈনিক ব্যায়াম কৰা আৰু অধিক শাৰীৰিকভাৱে সক্ৰিয় হোৱাৰ লগতে চেনিৰ মাত্ৰা কম ৰখা খাদ্য গ্ৰহণ কৰিব লাগে। ইয়াৰ লগতে তেজত চেনিৰ মাত্ৰা বৃদ্ধি কৰা খাদ্যও পৰিহাৰ কৰিব লাগে। কিছুমান স্বাস্থ্যকৰ শীতকালীন শাক-পাচলিয়েও আপোনাৰ তেজত শৰ্কৰাৰ মাত্ৰা বৃদ্ধি কৰিব পাৰে। ইয়াত সেই শাক-পাচলিবোৰৰ বিষয়ে লিখিছো যিবোৰ ডায়েবেটিছ ৰোগীয়ে খাব নালাগে আৰু যিবোৰে তেজত গ্লুক’জৰ মাত্ৰা বৃদ্ধি কৰে।
(১) সেউজীয়া পিঁয়াজ
শীতকালত পোৱা সেউজীয়া পিঁয়াজ বা পাত পিঁয়াজ স্বাস্থ্যৰ বাবে উপকাৰী। কিন্তু, স্বাস্থ্যৰ বাবে এই পাচলি যিমানেই ভাল নহওক কিয়, ডায়েবেটিছ ৰোগীৰ বাবে ই অতি ক্ষতিকাৰক বুলি প্ৰমাণিত । আচলতে সেউজীয়া পিঁয়াজৰ গ্লাইচেমিক ইনডেক্স বেছি। একে সময়তে ইয়াত ডায়েটাৰী ফাইবাৰতকৈ অধিক কাৰ্ব থাকে। কাৰ্বহাইড্ৰেটে তেজত চেনিৰ মাত্ৰা দ্ৰুতগতিত বৃদ্ধি কৰে, যাৰ ফলত ডায়েবেটিছৰ সমস্যা গুৰুতৰ হ’ব পাৰে।
(২) গাজৰ
শীতকালত গাজৰৰ চালাদ বা ইয়াৰ দ্বাৰা বনোৱা হালোৱা খোৱাটো ডায়েবেটিছ ৰোগীৰ বাবে ভাল নহয় কাৰণ গাজৰ খালে তেজত শৰ্কৰাৰ মাত্ৰা বৃদ্ধি পায়।
(৩) বীট
সীমিত পৰিমাণত বীট খোৱাটো ডায়েবেটিছ ৰোগীৰ বাবে উপকাৰী বুলি প্ৰমাণিত হয়, কিন্তু যদি আপুনি অত্যধিক পৰিমাণে বীট খাই আছে তেন্তে ই আপোনাৰ স্বাস্থ্যৰ ক্ষতিও কৰিব পাৰে।
(৪) কচু আৰু শিমলা আলু
মধুমেহ ৰোগত শিপাত হোৱা শাক-পাচলি যেনে মিঠা আলু, শিমলা আলু , আৰু কচুৰ গুটি সেৱন কৰাটোও পৰিহাৰ কৰিব লাগে। কাৰণ, ইয়াত অধিক পৰিমাণৰ কাৰ্বহাইড্ৰেট আৰু প্ৰাকৃতিক চেনি থাকে আৰু ই আপোনাৰ তেজৰ চেনিৰ মাত্ৰা বৃদ্ধি কৰে। সেইবাবেই মধুমেহ ৰোগত এইবোৰ পাচলি খোৱাৰ পৰা বিৰত থাকিবলৈ পৰামৰ্শ দিয়া হৈছে।
