By Good Assam
সকলো বয়সৰ লোকৰ থাইৰয়ডৰ সমস্যা বৃদ্ধি পোৱা দেখা গৈছে। আমাৰ ডিঙিত থকা থাইৰয়ড গ্ৰন্থিয়ে যেতিয়া অত্যধিক বা কম হৰম’ন উৎপাদন কৰিবলৈ আৰম্ভ কৰে তেতিয়া ই বহু সমস্যাৰ সৃষ্টি কৰে। থাইৰয়ডৰ বিকাৰ মূলতঃ দুবিধ – হাইপাৰথাইৰয়ডিজম আৰু হাইপ’থাইৰয়ডিজম।
হাইপাৰথাইৰয়ডিজমক অতি সক্ৰিয় থাইৰয়ড বুলিও কোৱা হয়, এই অৱস্থাত থাইৰয়ড হৰম’নৰ উৎপাদন অত্যধিক হৈ পৰে, আনহাতে হাইপ’থাইৰয়ডিজমৰ ক্ষেত্ৰত হৰম’নৰ উৎপাদন কমি যায়।
স্বাস্থ্য বিশেষজ্ঞসকলে কয় যে, আমাৰ দৈনন্দিন জীৱন আৰু খাদ্যাভ্যাসত বিঘিনি ঘটিলে এই বিকাৰসমূহ বৃদ্ধি পাব পাৰে, যাৰ বিষয়ে সকলো মানুহে জনা উচিত আৰু প্ৰতিৰোধমূলক ব্যৱস্থা গ্ৰহণ কৰি থাকিব লাগে। সঠিক খাদ্য আৰু নিয়মীয়া ব্যায়ামৰ দৰে ব্যৱস্থাৰ সহায়ত আপুনি এই সমস্যাবোৰৰ পৰা আঁতৰি থাকিব পাৰে।
থাইৰয়ডৰ বিকাৰৰ বিষয়ে জানি লওক :
থাইৰয়ড হৈছে পখিলাৰ আকৃতিৰ গ্ৰন্থি, যি ডিঙিৰ আগফালৰ অংশত অৱস্থিত। এই গ্ৰন্থিয়ে শৰীৰৰ বিপাকীয় ক্ৰিয়া, শক্তি উৎপাদন আৰু হৰম’নৰ ভাৰসাম্য নিয়ন্ত্ৰণ কৰে। হাইপোথাইৰয়ডিজম ৰোগত আক্ৰান্ত লোকসকলে ক্লান্তি আৰু দুৰ্বলতা, ওজন বৃদ্ধি, চুলি সৰা, কোষ্ঠকাঠিন্য, হতাশা আৰু ঋতুস্ৰাৱৰ অনিয়ম আদি সমস্যাত ভুগিব পাৰে।
একে সময়তে হাইপাৰথাইৰয়ডিজমৰ বাবে আপোনাৰ ওজন কমি যোৱা, সঘনাই নাৰ্ভাছ হোৱা, দ্ৰুত হৃদস্পন্দন, অনিদ্ৰা আৰু খিংখিঙীয়া হোৱা আদি সমস্যাও দেখা দিয়ে।
থাইৰয়ড ৰোগীয়ে কি কৰিব লাগে?
স্বাস্থ্য বিশেষজ্ঞসকলে কৈছে যে ৩০ বছৰ বয়সৰ পিছত সকলোৱে চিকিৎসকৰ পৰামৰ্শ মতে নিয়মিতভাৱে থাইৰয়ড পৰীক্ষা কৰি থাকিব লাগে। ইয়াৰ বাহিৰেও ৰুটিনত কিছু পৰিৱৰ্তন কৰাটো প্ৰয়োজনীয়।
• আয়’ডিনযুক্ত খাদ্য (নিমখ, দৈ, কল, মাছ), গোটা শস্য, সেউজীয়া পাতৰ শাক-পাচলি আৰু বাদাম খাব লাগে।
• নিয়মীয়া ব্যায়ামৰ অভ্যাস গঢ়ি তোলক। এই ৰোগত সৰ্বাংগাসন, হালাসন, ভুজংগাসন আদি যোগ অতি উপকাৰী বুলি কোৱা হৈছে।
• থাইৰয়ড হৰম’নৰ ভাৰসাম্যহীনতাৰ বাবে টোপনিৰ সমস্যা হ’ব পাৰে। অন্ততঃ ৭-৮ ঘণ্টা টোপনিৰ প্ৰয়োজন।
থাইৰয়ড ৰোগীয়ে কি কৰা উচিত নহয়?
থাইৰয়ডৰ সমস্যা থকা লোকসকলে ফাষ্ট ফুড, অত্যধিক ভজা খাদ্য, চৰ্বি, তেল বা মিঠা পানীয় কমকৈ সেৱন কৰিব লাগে। ইয়াৰ উপৰিও চয়াবিনৰ সামগ্ৰীয়ে থাইৰয়ড হৰম’ন শোষণত প্ৰভাৱ পেলাব পাৰে, ইয়াকো পৰিহাৰ কৰক। মানসিক চাপৰ পৰিস্থিতিয়ে থাইৰয়ডৰ সমস্যা আৰু বেছি বেয়া কৰিব পাৰে, গতিকে মানসিক চাপ নিয়ন্ত্ৰণ কৰক। ধূমপান নকৰিবলৈ আৰু সুৰা সেৱন নকৰিবলৈ পৰামৰ্শ দিয়া হৈছে।
থাইৰয়ডৰ সমস্যা থকা লোকে গুৰুত্ব দিব লাগে :
চিকিৎসকৰ মতে, থাইৰয়ডৰ সমস্যা কিছুমান ক্ষেত্ৰত গুৰুতৰ হ’ব পাৰে। কিন্তু পুষ্টিকৰ খাদ্য, নিয়মীয়া ব্যায়াম, মানসিক চাপ নিয়ন্ত্ৰণ আৰু নিয়মিত ঔষধ সেৱনৰ দ্বাৰা থাইৰয়ড নিয়ন্ত্ৰণ কৰিব পাৰি। থাইৰয়ড ৰোগীক জীৱনশৈলী উন্নত কৰিবলৈ পৰামৰ্শ দিয়া হৈছে যাতে এই ৰোগৰ ফলত সৃষ্টি হোৱা সমস্যাৰ পৰা হাত সাৰিব পৰা যায়। প্ৰতি ৬ মাহৰ মূৰে মূৰে থাইৰয়ড পৰীক্ষা কৰাব লাগে আৰু চিকিৎসকৰ পৰামৰ্শ অবিহনে ঔষধ বন্ধ নকৰিব।
