( অপূৰ্ব দাস )
আমাৰ বৃক্কই সমগ্ৰ শৰীৰটো সুস্থ কৰি ৰখাত আৰু ভালদৰে কাম কৰাত সহায় কৰে। সুস্থ জীৱনশৈলীৰ দ্বাৰা বৃক্ক সম্পৰ্কীয় ৰোগৰ সম্ভাৱনা বহু পৰিমাণে হ্ৰাস কৰিব পাৰি। কিডনী কেনেকৈ সুস্থ কৰি তুলিব পাৰি জানো আহক-
স্বাস্থ্যই হৈছে সৰ্বাধিক পৰম ধন। সুস্থ শৰীৰতকৈ ডাঙৰ একো হ’ব নোৱাৰে। কিন্তু যোৱা কেইবছৰমানৰ পৰা ৰোগবোৰ দ্ৰুতগতিত বৃদ্ধি পাইছে। ভাৰতত বৃক্ক সম্পৰ্কীয় ৰোগক লৈ যথেষ্ট চিন্তাৰ সৃষ্টি হৈছে। ইণ্ডিয়ান কাউন্সিল অৱ মেডিকেল ৰিচাৰ্চ (আই চি এম আৰ)ৰ শেহতীয়া প্ৰতিবেদন অনুসৰি ভাৰতত প্ৰতি বছৰে ২ লাখৰো অধিক লোক বৃক্কৰ ৰোগত আক্ৰান্ত হৈ মৃত্যুমুখত পৰে। এইটো এটা বৃহৎ সংখ্যা আৰু ইয়াৰ বাবে তৎকালীন মনোযোগ আৰু বৃক্ক সম্পৰ্কে সজাগতা বৃদ্ধিৰ প্ৰয়োজন।
বৃক্ক সম্পৰ্কীয় বিকাৰসমূহ কেনেকৈ প্ৰাৰম্ভিক অৱস্থাত ধৰা পেলাব পাৰি জানো আহক-
প্ৰথমতে বৃক্কৰ তৎকালীন আৰু দীৰ্ঘদিনীয়া ৰোগৰ মাজত কি পাৰ্থক্য আছে সেয়া জনাটো গুৰুত্বপূৰ্ণ। শাৰীৰিক আঘাত বা সংক্ৰমণৰ ফলত হঠাতে বৃক্কৰ কাৰ্য্যক্ষমতা হেৰুৱাই পেলোৱা হ’ল তৎকালীন বৃক্কৰ ৰোগ। কেইদিনমানৰ ভিতৰতে ইয়াৰ বিকাশ ঘটে আৰু উপযুক্ত চিকিৎসাৰ দ্বাৰা আৰোগ্য লাভ কৰিব পাৰি।
আনহাতে ক্ৰনিক ( দীৰ্ঘদিনীয়া ) কিডনী ডিজিজ হৈছে দীৰ্ঘদিনীয়া ৰোগ য’ত বৃক্কই দীৰ্ঘ সময়ৰ বাবে নিজৰ কাৰ্য্যক্ষমতা হেৰুৱাই পেলায়। ডায়েবেটিছ আৰু উচ্চ ৰক্তচাপৰ দৰে ৰোগৰ বাবে এনে হ’ব পাৰে।
বৃক্কৰ ৰোগৰ প্ৰাৰম্ভিক লক্ষণ জনাটো অতি প্ৰয়োজনীয়
বৃক্ক বিকল হোৱাৰ প্ৰাৰম্ভিক লক্ষণসমূহ অতি মৃদু আৰু ইয়াক সহজেই আওকাণ কৰিব পাৰি। ইয়াৰ ভিতৰত ভাগৰুৱা, দুৰ্বলতা, ভৰি ফুলা, প্ৰস্ৰাৱৰ ধৰণ সলনি হোৱা, প্ৰস্ৰাৱত তেজ, উচ্চ ৰক্তচাপ আদি লক্ষণ দেখা দিব পাৰে। কেতিয়াবা এইবোৰ আন কোনো ৰোগৰ কাৰণো হ’ব পাৰে। গতিকে চিকিৎসকৰ পৰামৰ্শ লোৱাটো ভাল হ’ব।
কিডনী কেনেকৈ সুৰক্ষিত ৰাখিব?
বৃক্ক সুস্থ কৰি ৰাখিবলৈ স্বাস্থ্যসন্মত জীৱনশৈলী গ্ৰহণ কৰা আৱশ্যক । নিয়মিত ব্যায়াম, সুষম খাদ্য, নিমখ কম, চেনি কম আৰু প্ৰচুৰ পৰিমাণে পানী খোৱাৰ অভ্যাস গঢ়ি তোলক। ৰক্তচাপ আৰু ব্লাড চুগাৰ পৰীক্ষা কৰি থকাটোও আপোনাৰ বাবে গুৰুত্বপূৰ্ণ। কাৰণ বৃক্কৰ ৰোগ হোৱাৰ সম্ভাৱনা যথেষ্ট বৃদ্ধি পায়।
জীৱনশৈলীৰ পৰিৱৰ্তনৰ উপৰিও বৃক্ক সুৰক্ষিত ৰখাৰ বাবে আন কিছুমান ব্যৱস্থাও গ্ৰহণ কৰক। ধূমপান এৰি দিয়াটো অন্যতম ফলপ্ৰসূ উপায়। ধূমপানে হাওঁফাওঁৰ ক্ষতি কৰাই নহয়, বৃক্কৰ কাৰ্য্যক্ষমতাতো প্ৰভাৱ পেলায়। অত্যধিক মদ্যপানৰ পৰা বিৰত থাকিব লাগে কাৰণ ইয়াৰ ফলত উচ্চ ৰক্তচাপ আৰু অন্যান্য সমস্যাৰ সৃষ্টি হ’ব পাৰে। বেছিকৈ নিমখ আৰু চেনি সেৱন নকৰিব।
