আজি হালধি পিঠা খালেনে? এই সময়ত কিয় খোৱা হয় হালধি পিঠা, জানিবলৈ পঢ়িব।
( অপূৰ্ব দাস )
হালধি এক শক্তিশালী বনৌষধি আৰু মছলা হিচাপে জনা যায়। অসমীয়া সমাজত কোনো কোনো ঠাইত ফাগুন মাহৰ শেষত বা চ'ত মাহৰ দোমাহীত হালধি পিঠা খোৱাৰ পৰম্পৰা আছে।
কিয় খোৱা হয় হালধি পিঠা?
অসমীয়া সমাজতো হালধিৰ বিশেষ গুৰুত্ব আছে। ইয়াৰ ঔষধি গুণ আৰু ৰং আছে বাবেই ইয়াক খাদ্যত ব্যৱহাৰ কৰা হয়। বসন্তৰ আগমনৰ সময়ত পছোৱা বতাহ বলে, লগতে বৰষুণ দিবলৈ আৰম্ভ কৰে। এনে সময়ত বিভিন্ন বেক্টেৰিয়া, ভাইৰাছৰো বংশ বৃদ্ধি হ'য়। বতাহত বিভিন্ন বেমাৰৰ বীজাণু বিয়পি ফুৰে; যাৰ ফলত জ্বৰ, চৰ্দী, কাহ, বমি, ডায়েৰিয়া, খৰ, ছালৰ ৰোগ, চকুৰ ৰোগ, বসন্ত, কৃমি ইত্যাদি হ'য়। হালধিয়ে ৰোগ প্ৰতিৰোধ ক্ষমতা বৃদ্ধি কৰি এই ৰোগবোৰ ধ্বংস কৰাত সহায় কৰে বাবে এনে সময়ত হালধি যুক্ত খাদ্য - হালধি পিঠা খোৱা হয়। লগতে গৰু বিহুৰ দিনাখনো হালধি দেহত লগাই ছালৰ ৰোগ দূৰ কৰা হয়। হোলীৰ ফাঁকুৱাৰ বাবেও হালধি ব্যৱহাৰ কৰিব পাৰি।
হালধিৰ বহু উপকাৰ আছে। এই উপকাৰিতাৰ বিষয়ে তলত উল্লেখ কৰা হ'ল -
আয়ুৰ্বেদ আৰু আন বহুতো চিকিৎসা ব্যৱস্থাত হলুদক নিৰাময় ঔষধ হিচাপে জনা যায়। কেৱল এয়াই নহয়, ইয়াত কাৰকুমিনোইড আৰু আন বহুতো শক্তিশালী উপাদান পোৱা যায়, যিয়ে তলত দিয়া স্বাস্থ্য উপকাৰীতাসমূহ প্ৰদান কৰে।
আয়ুৰ্বেদ আৰু আন বহুতো চিকিৎসা ব্যৱস্থাত হালধিক কিছুমান ৰোগ নিৰাময় ঔষধ হিচাপে জনা যায়। কেৱল এয়াই নহয়, ইয়াত কাৰকুমিনোইড আৰু আন বহুতো শক্তিশালী উপাদান পোৱা যায়, যিয়ে তলত দিয়া স্বাস্থ্য উপকাৰীতাসমূহ প্ৰদান কৰে -
(১) হালধিয়ে ফুলা আৰু ৰঙা পৰা কমাব পাৰে
বহু প্ৰাচীন চিকিৎসা পদ্ধতি আৰু ঘৰুৱা উপায়ত হালধি ব্যৱহাৰ কৰা হয় ছালৰ প্ৰদাহ আৰু ৰঙা পৰা আদি সমস্যাৰ চিকিৎসাৰ বাবে। কিছুমান গৱেষণাৰ মতে হালধিত থকা কাৰকুমিনৰ প্ৰদাহ নিবাৰণ গুণ আছে, যিয়ে ফুলা আৰু ৰঙা পৰা কমোৱাত সহায় কৰিব পাৰে।
(২) বিষ কম কৰিবলৈ হালধি সেৱন কৰিব লাগে
হালধিৰ ওপৰত কিছু গৱেষণা কৰা হৈছিল য’ত দেখা গৈছে যে হালধি সেৱন কৰিলে মগজু শান্ত হয় আৰু লগতে শৰীৰৰ বিষ কমায়। আয়ুৰ্বেদৰ মতে শৰীৰত কোনো ধৰণৰ আঘাত হ’লে হালধি মিহলাই গৰম গাখীৰ খাব লাগে।
(৩) হালধিয়ে যকৃতক সুস্থ কৰি ৰাখে
হালধিত বহুতো শক্তিশালী এন্টিঅক্সিডেন্ট থাকে, যিয়ে যকৃতক বিষাক্ত পদাৰ্থৰ দ্বাৰা ক্ষতিগ্ৰস্ত হোৱাত বাধা দিয়ে। নিয়মিতভাৱে হালধি সেৱন কৰিলে যকৃত সুস্থ কৰি ৰখাত সহায়ক হয়।
(৪) হালধিয়ে হজম শক্তি উন্নত কৰাত সহায় কৰে
পেটৰ সমস্যা থকা লোকৰ বাবে হালধি খোৱাটো উপকাৰী। হালধিত বহুতো সক্ৰিয় উপাদান পোৱা যায়, যিয়ে পেট সুস্থ কৰি ৰাখে আৰু ফলত হজম প্ৰক্ৰিয়া উন্নত হয়।
(৫) হালধিয়ে হতাশা কমোৱাত সহায় কৰে
হালধিত পোৱা এক শক্তিশালী উপাদান কাৰকুমিনে কেৱল যকৃত আৰু ছাল সুস্থ কৰি ৰখাই নহয়, ই মানসিক স্বাস্থ্য বজাই ৰখাতো সহায় কৰে। বেছিভাগ অধ্যয়নতে এইটোও দেখা গৈছে যে উপযুক্ত পৰিমাণত হালধি সেৱন কৰিলে হতাশাৰ দৰে অৱস্থা কিছু পৰিমাণে হ্ৰাস কৰিব পৰা যায়।
(৬) ছালৰ ৰোগ দূৰ কৰাত সহায় কৰে
হালধি যুক্ত পানীৰে গা ধুলে নাইবা কেঁচা হালধিৰ পেষ্ট নাৰীকল তেলৰ সৈতে মিহলি কৰি আধা ঘণ্টা ছালত লগালে ছালৰ বিভিন্ন ৰোগ যেনে - শালমইন, খৰ , খজুৱতি, বেচু ইত্যাদি দূৰ হ'য়।
(৭) কাহ আৰু চৰ্দীৰ পৰা ৰক্ষা
কাহ-চৰ্দী আদিৰ পৰা ৰক্ষা পাবলৈ কেঁচা হালধিৰ গুড়ি ২ চামুচ, জাতি জালুক ২ টাৰ গুড়ি আৰু পচতীয়া গছৰ পাত এমুঠি উতলাই একাপ মৌৰ লগত খালেও সুফল পোৱা যায়।
ওপৰত উল্লেখ কৰা হালধিৰ উপকাৰিতা সম্পূৰ্ণৰূপে অধ্যয়নৰ ওপৰত ভিত্তি কৰি কৰি লিখা হৈছে।
প্ৰতিজন ব্যক্তিৰ শৰীৰত হালধিয়ে বেলেগ বেলেগ ধৰণে কাম কৰিব পাৰে। হালধিৰ অত্যাধিক ব্যৱহাৰে ক্ষতিও কৰিব পাৰে।
যদি হালধি খাদ্য সামগ্ৰীত মছলা হিচাপে মিহলাই উপযুক্ত পৰিমাণত সেৱন কৰা হয়, তেন্তে স্বাস্থ্যৰ দৃষ্টিকোণৰ পৰা ইয়াক নিৰাপদ বুলি ধৰা হয়। কিন্তু স্বাভাৱিকতকৈ অধিক পৰিমাণে সেৱন কৰিলে স্বাস্থ্যৰ ওপৰত তলত দিয়া বিৰূপ প্ৰভাৱ পৰিব পাৰে -
• হালধিত কিছুমান উপাদান থাকে যিবোৰ উপযুক্ত পৰিমাণত গ্ৰহণ কৰিলে স্বাস্থ্য ৰক্ষা কৰে। ইয়াৰ বিপৰীতে এই একেবোৰ উপাদানেই বেছি পৰিমাণে সেৱন কৰিলে পেটৰ বিষ, জ্বলন, ডায়েৰিয়া, গেষ্ট্ৰীক আদি সমস্যাৰ সৃষ্টি হ’ব পাৰে।
• জণ্ডিছ আৰু ৰক্ত কম থাকিলে হালধি খোৱা উচিত নহয়। গেছট্ৰিক ৰোগ থাকিলেও হালধিৰ পৰিমাণ কমকৈ খাব লাগে।
• কিছুমান গৱেষণাৰ পৰা দেখা গৈছে যে অত্যধিক হালধি সেৱন কৰিলে তেজ পাতল হৈ পৰে, যাৰ ফলত ৰক্তক্ষৰণ আৰু নাকৰ পৰা তেজ ওলোৱাৰ দৰে সমস্যাৰ সৃষ্টি হ’ব পাৰে।
