( অপূৰ্ব দাস )
ৰঙৰ দ্বাৰা মানসিক আৰু শাৰীৰিক স্বাস্থ্যক প্ৰভাৱিত কৰাৰ এক পদ্ধতি হৈছে ৰং চিকিৎসা। ইয়াক Chromotherapy বুলিও কোৱা হয়।
হোলী হৈছে ৰঙৰ উৎসৱ। এই উৎসৱত ৰাইজে নিজৰ আপোনজন আৰু বন্ধু-বান্ধৱীক ৰং প্ৰয়োগ কৰি হোলীৰ শুভেচ্ছা জনায় আৰু উৎসাহেৰে উৎসৱ উদযাপন কৰে। ৰং প্ৰয়োগ কৰাটো কেৱল ধৰ্মীয় বা কেৱল ধেমালিৰ বাবেই সীমাবদ্ধ নহয় যদিও ইয়াৰ বৈজ্ঞানিক কাৰণো আছে। হোলীৰ ৰঙেৰে খেলাটোও স্বাস্থ্যকৰ হ’ব পাৰে। এইটো এটা ধৰণৰ ৰং চিকিৎসা, যিয়ে আমাৰ মগজু আৰু শক্তিৰ মাত্ৰাত গভীৰ প্ৰভাৱ পেলায়। হোলীত ৰঙৰ সৈতে খেলা-ধূলা কৰিলে মনলৈ আনন্দ, শক্তি আৰু আশাবাদৰ অনুভূতি আনে।
হোলীত ৰং ব্যৱহাৰ কৰিলে শাৰীৰিক, মানসিক আৰু আৱেগিক উপকাৰ পোৱা যায়। গতিকে হোলীত ৰং বিজ্ঞান বুজিব পাৰিব এই লিখনিৰ জৰিয়তে । এই লেখাটোত হোলীৰ ৰঙৰ বৈজ্ঞানিক গুৰুত্ব, ৰং চিকিৎসা কি আৰু ইয়াৰ স্বাস্থ্যজনিত উপকাৰিতা কি সেই বিষয়ে লিখা হৈছে।
ৰং চিকিৎসা কি?
ৰঙৰ দ্বাৰা মানসিক আৰু শাৰীৰিক স্বাস্থ্যক প্ৰভাৱিত কৰাৰ এক পদ্ধতি হৈছে ৰং চিকিৎসা। ইয়াক Chromotherapy বুলিও কোৱা হয়। এই থেৰাপীত প্ৰতিটো ৰঙৰ এক বিশেষ তাৎপৰ্য আছে। ৰং আৰু পোহৰ ব্যৱহাৰ কৰি স্বাস্থ্য উন্নত কৰাৰ প্ৰয়াস কৰা হয়।
ৰঙৰ চিকিৎসা কেনেকৈ কাম কৰে?
ৰং চিকিৎসাত ৰঙৰ জৰিয়তে শৰীৰৰ বহু উপাদানৰ ভাৰসাম্য ৰক্ষাৰ প্ৰয়াস কৰা হয়। কোনো এটা ৰং দেখিলে আমাৰ মগজুৱে সেই ৰঙৰ ঢৌ গ্ৰহণ কৰে আৰু সেই অনুসৰি আমাৰ আৱেগ আৰু শৰীৰে প্ৰতিক্ৰিয়া প্ৰকাশ কৰে।
ৰঙৰ চিকিৎসাৰ উপকাৰিতা :
(১) ৰং ৰঙা
শক্তি আৰু আত্মবিশ্বাসৰ ৰং। এই ৰঙে উৎসাহ আৰু সাহস বৃদ্ধিত সহায় কৰে। ৰক্ত সঞ্চালন উন্নত কৰে আৰু ভাগৰ দূৰ কৰে। কিন্তু অত্যধিক ৰঙা ৰঙে খং আৰু আক্ৰমণাত্মকতাও বৃদ্ধি কৰিব পাৰে, গতিকে ইয়াক পৰিমিতভাৱে ব্যৱহাৰ কৰিব লাগে।
(২) হালধীয়া ৰং
ইতিবাচকতা আৰু বুদ্ধিমত্তাৰ ৰং হালধীয়া। এই ৰঙে সুখ, আত্মনিৰ্ভৰশীলতা আৰু সৃষ্টিশীলতা বৃদ্ধি কৰে। পাচনতন্ত্ৰ শক্তিশালী কৰে আৰু একাগ্ৰতা বৃদ্ধি কৰে। মানসিক বিষণ্ণতা আৰু মানসিক চাপ দূৰ কৰাত এই ৰং সহায়ক।
(৩) সেউজীয়া ৰং
সেউজীয়া ৰঙে আভ্যন্তৰীণ শান্তি আৰু ভাৰসাম্য বজাই ৰখাত সহায় কৰে। ই হৃদযন্ত্ৰ আৰু হাওঁফাওঁৰ কাৰ্য্যক্ষমতা শক্তিশালী কৰে। প্ৰকৃতিৰ লগত জড়িত এই ৰং মানসিক চাপ কমোৱাত সহায়ক।
(৪) নীলা ৰং
নীলা ৰং শীতলতা আৰু শান্তিৰ ৰং। ই টোপনিৰ মান উন্নত কৰে আৰু মানসিক চাপৰ পৰা উপশম দিয়ে। ৰক্তচাপ নিয়ন্ত্ৰণতো নীলা ৰং সহায়ক বুলি বিবেচিত হয়।
হোলীত ৰঙৰ বৈজ্ঞানিক গুৰুত্ব :
হোলীৰ উৎসৱ বসন্ত কালত পৰে। এই সময়ছোৱাত বতৰৰ পৰিৱৰ্তন ঘটে যাৰ ফলত শৰীৰত বহু ধৰণৰ সংক্ৰমণ আৰু এলাৰ্জীৰ সম্ভাৱনা বাঢ়ি যায়। গতিকে বসন্ত কালত ৰং ব্যৱহাৰ কৰিলে আমাৰ শৰীৰটো ধনাত্মক শক্তিৰে ভৰি পৰে। ৰঙৰ সৈতে খেলা কৰিলে এণ্ড’ৰ্ফিন (সুখী হৰম’ন) নিৰ্গত হয়, যিয়ে মগজু উন্নত কৰে। হোলীৰ সময়ত মানুহে ঘৰৰ বাহিৰত ৰ’দত ৰঙেৰে খেলে। সূৰ্যৰ পোহৰে হাড় আৰু ৰোগ প্ৰতিৰোধ ক্ষমতাৰ বাবে উপকাৰী ভিটামিন ডি যোগান ধৰে। প্ৰাকৃতিক ৰং ছালৰ বাবেও উপকাৰী আৰু বিষাক্ত পদাৰ্থ আঁতৰোৱাত সহায় কৰে।
ৰঙৰ চিকিৎসা কেনেকৈ গ্ৰহণ কৰিব?
হোলীৰ সময়ত ৰঙৰ সৈতে খেলা-ধূলা কৰাৰ উপৰিও বহু দিশত ৰং চিকিৎসা গ্ৰহণ কৰিব পাৰে। আপোনাৰ ঘৰ বা অফিচৰ বেৰত শান্ত কৰা ৰং ব্যৱহাৰ কৰক। ৰঙীন চিত্ৰৰে সজাই লওক আৰু সেইবোৰ চাওক। কাপোৰ আৰু আনুষংগিক বস্তুত আপোনাৰ মেজাজ অনুসৰি ৰং অন্তৰ্ভুক্ত কৰক। ৰঙীন পোহৰ আৰু সজ্জাৰে মেজাজক প্ৰভাৱিত কৰক। দৈনিক ধ্যান বা যোগাসনৰ সময়ত উপযুক্ত সেউজীয়া আৰু গেৰুৱা ৰঙৰ ধ্যান কৰক।
সাৱধানতা: কেৱল প্ৰাকৃতিক ৰং হে ব্যৱহাৰ কৰিব। কেমিকেল ৰঙে হৃদযন্ত্ৰৰ ৰোগ, স্বাস-প্ৰশ্বাস জনিত ৰোগ, কেন্সাৰ, এলাৰ্জি, চকুৰ ৰোগ বৃদ্ধি কৰে।
