By Good Assam
কলৰেক্টাল কেন্সাৰ বিশ্বজুৰি তৃতীয় সৰ্বাধিক ভয়ংকৰ কেন্সাৰ। যোৱা কেইবছৰমানৰ পৰা কলৰেক্টাল কেন্সাৰৰ সম্ভাৱনা দ্ৰুতগতিত বৃদ্ধি পাইছে। যদি আপুনি শৰীৰত এনে কোনো পৰিৱৰ্তন লক্ষ্য কৰে, ভুলতেও আওকাণ নকৰিব। কলৰেক্টাল কেন্সাৰৰ প্ৰাৰম্ভিক লক্ষণসমূহ কি কি জানিবলৈ পঢ়িব -
কলৰেক্টাল কেন্সাৰ হৈছে বৃহদান্ত্ৰ বা মলদ্বাৰত হোৱা কেন্সাৰ। ই বিশ্বৰ অন্যতম ভয়ংকৰ কৰ্কট ৰোগ। বয়সৰ লগে লগে কলৰেক্টাল কেন্সাৰৰ সম্ভাৱনা বৃদ্ধি পায়। বেছিভাগ ক্ষেত্ৰতে ৫০ বছৰৰ ওপৰৰ লোকৰ ক্ষেত্ৰত দেখা দিয়ে। বিশ্ব স্বাস্থ্য সংস্থা (WHO)ৰ তথ্য অনুসৰি বিশ্বজুৰি ক’লন কেন্সাৰ কৰ্কট ৰোগত মৃত্যুৰ দ্বিতীয়টো প্ৰধান কাৰণ। ২০৪০ চনৰ ভিতৰত কলৰেক্টাল কেন্সাৰৰ বোজা প্ৰতি বছৰে ৩২ লাখ নতুন ৰোগী (৬৩% বৃদ্ধি) আৰু ১৬ লাখ মৃত্যু (৭৩%)লৈ বৃদ্ধি পাব পাৰে। কলৰেক্টাল কেন্সাৰ যিমানেই আগতে চিনাক্ত হ’ব সিমানেই মৃত্যুৰ সম্ভাৱনা কম। গতিকে ভুলতেও এই ৫টা প্ৰাৰম্ভিক লক্ষণক আওকাণ নকৰিব।
কলৰেক্টাল কেন্সাৰৰ ৫টা লক্ষণ :
(১) মল-মূত্ৰৰ পৰিৱৰ্তন- মল-মূত্ৰৰ পৰিৱৰ্তন কলৰেক্টাল কেন্সাৰৰ লক্ষণ হ’ব পাৰে। দীৰ্ঘদিনীয়া ডায়েৰিয়া বা কোষ্ঠকাঠিন্য বা মলৰ যিকোনো পৰিৱৰ্তন যিটো আপুনি কিছুদিনৰ পৰা অনুভৱ কৰি আহিছে সেয়া বিপদজনক হ’ব পাৰে। যদি আপুনি অনুভৱ কৰে যে পেটটোত গেছ , সৌচ পনীয়া, থপথপীয়া বা সৌচ কঠিন তেন্তে অতি সোনকালে চিকিৎসকৰ পৰামৰ্শ লওক।
(২) সৌচত তেজ – সৌচত তেজ কলৰেক্টাল কেন্সাৰৰ লক্ষণ হ’ব পাৰে। ইয়াত মলৰ সময়ত ৰক্তক্ষৰণ বা ক্লটৰ দৰে স্ৰাৱ আৰম্ভ হয়। কেতিয়াবা সৌচৰ ৰং গাঢ় বা পাতল ক’লা দেখা যায়। যদি এনে কোনো লক্ষণ দেখা যায় তেন্তে লগে লগে চিকিৎসকৰ পৰামৰ্শ ল’ব লাগে।
(৩) পেটৰ বিষ বা অস্বস্তি অনুভৱ কৰা – পেটৰ অস্বস্তি সাধাৰণতে কলৰেক্টাল কেন্সাৰত দেখা দিয়ে। য’ত পেটত অবিৰতভাৱে বিষ অনুভৱ হ’ব পাৰে। পেট ফুলাৰ সমস্যা হ’ব পাৰে বা গেছ বৃদ্ধি হ’ব পাৰে। যাৰ বাবে অস্বস্তিৰ সৃষ্টি হয়।
(৪) কোনো কাৰণ নোহোৱাকৈ হঠাতে ওজন কমি যোৱা – কলৰেক্টাল কেন্সাৰত হঠাতে ওজন কমি যায়। অত্যধিক ক্লান্তি আৰু দুৰ্বলতা কলৰেক্টাল কাৰ্চিনোমাৰ সাধাৰণ লক্ষণ। এই লক্ষণসমূহ আওকাণ নকৰিব।
(৫) উশাহ-নিশাহ লোৱাত অসুবিধা- কেতিয়াবা কলৰেক্টাল কেন্সাৰত দীৰ্ঘদিনীয়া ৰক্তক্ষৰণৰ ফলত ৰক্তহীনতা হ’ব পাৰে। যাৰ বাবে ভাগৰ আৰু উশাহ-নিশাহ লোৱাত কষ্ট আৰম্ভ হয়। এই লক্ষণসমূহ আওকাণ কৰিব নালাগে। যদি আপুনি এনেকুৱা অনুভৱ কৰিছে তেন্তে নিশ্চিতভাৱে লগে লগে চিকিৎসকৰ পৰামৰ্শ লওক।
