( অপূৰ্ব দাস )
আমেৰিকাৰ ব্যৱসায়ী ইলন মাস্কৰ চেটেলাইট ভিত্তিক ইণ্টাৰনেট সেৱা ষ্টাৰলিংকৰ বিষয়ে আজি প্ৰতিটো জিভাতে আলোচনা কৰা হৈছে। বৰ্তমান সময়ত ষ্টাৰলিংকে ভাৰতত কাম কৰাৰ বাবে চৰকাৰৰ পৰা অনুমতি লাভ কৰা নাই যদিও কোম্পানীটোৱে টেলিকম খণ্ডৰ দুটা বৃহৎ কোম্পানী ৰিলায়েন্স জিঅ’ আৰু এয়াৰটেলৰ সৈতে চুক্তিবদ্ধ হৈছে। এতিয়া আশা কৰা হৈছে যে চৰকাৰৰ পৰা অনুমতি পোৱাৰ লগে লগে ষ্টাৰলিঙ্কে এয়াৰটেল আৰু জিঅ’ৰ সহায়ত ভাৰতত চেটেলাইট ইণ্টাৰনেট সেৱা প্ৰদান কৰিবলৈ আৰম্ভ কৰিব। ষ্টাৰলিংকৰ বিষয়ে কোৱা হৈছে যে ই চেটেলাইটৰ পৰা পোনপটীয়াকৈ ইণ্টাৰনেট প্ৰদান কৰিব, যাৰ বাবে ফাইবাৰ কেবল স্থাপন বা টাৱাৰ স্থাপনৰ প্ৰয়োজন নাথাকিব। বহু বিশেষজ্ঞৰ মতে এই প্ৰযুক্তিয়ে আমাৰ ইণ্টাৰনেট ব্যৱহাৰৰ ধৰণত এক বৃহৎ পৰিৱৰ্তন আনিব পাৰে।
কিন্তু প্ৰশ্ন উত্থাপন হয় যে যেতিয়া জিঅ’ আৰু এয়াৰটেলে ইতিমধ্যে দেশত এয়াৰফাইবাৰৰ জৰিয়তে বেতাঁৰ বা তাঁৰ নোহোৱা ব্ৰডবেণ্ড ইণ্টাৰনেট সেৱা আগবঢ়াইছে, তেন্তে কিয় চেটেলাইট ইন্টাৰনেটৰ প্ৰয়োজন হৈছে? এই প্ৰশ্নৰ উত্তৰ জানিবলৈ প্ৰথমে চেটেলাইট ইণ্টাৰনেটত কাম কৰা প্ৰযুক্তিটো বুজিব লাগিব আৰু লগতে দুয়োটা প্ৰযুক্তি ইটোৱে সিটোৰ পৰা কেনেকৈ পৃথক সেইটোও জানিব লাগিব।
প্ৰথমে জানো আহক এয়াৰফাইবাৰে কেনেকৈ কাম কৰে -
জিঅ’ আৰু এয়াৰটেলে প্ৰদান কৰা এয়াৰফাইবাৰ সেৱা বেতাঁৰ অৰ্থাৎ তাঁৰ নোহোৱা ইন্টাৰনেট প্ৰযুক্তি। ইয়াত উন্নত wifi 6 প্ৰযুক্তিৰ জৰিয়তে দ্ৰুতবেগী 5G ইণ্টাৰনেট প্ৰদান কৰিছে । এয়াৰফাইবাৰ ডিভাইচে ওচৰৰ টাৱাৰৰ পৰা ইণ্টাৰনেটত প্ৰৱেশ কৰে। অৰ্থাৎ বেতাঁৰ হোৱাৰ পিছতো এই প্ৰযুক্তি ইণ্টাৰনেটৰ বাবে টাৱাৰৰ ওপৰত নিৰ্ভৰশীল। যিবোৰ ঠাইত কোম্পানীয়ে ব্ৰডবেণ্ড ফাইবাৰ কেবল স্থাপন কৰিব নোৱাৰে বা টাৱাৰ স্থাপন কৰিব নোৱাৰে, সেইবোৰ ঠাইত এই প্ৰযুক্তি অতি সহায়ক।
ষ্টাৰলিংকে কেনেকৈ কাম কৰে জানো আহক -
ভাৰতত পোৱা এয়াৰফাইবাৰৰ পৰা ষ্টাৰলিংক বহুত বেলেগ। এয়াৰফাইবাৰত ইণ্টাৰনেট প্ৰদান কৰিবলৈ টাৱাৰৰ প্ৰয়োজন হ’লেও ষ্টাৰলিংক সম্পূৰ্ণৰূপে বেতাঁৰ, অৰ্থাৎ ইয়াৰ বাবে ফাইবাৰ কেবল বা টাৱাৰৰ প্ৰয়োজন নাই। ইয়াৰ লগত অহা এটা সৰু ডিভাইচে চেটেলাইটৰ পৰা পোনপটীয়াকৈ ইণ্টাৰনেট লৈ আপোনাৰ ঘৰলৈ পঠিয়াই দিয়ে। যিবোৰ ঠাইত মোবাইল টাৱাৰ স্থাপন বা কেবল ৰখাৰ ঠাই নাথাকে, সেইবোৰ ঠাইত এই প্ৰযুক্তি অতি উপযোগী হ’ব পাৰে। পাহাৰীয়া আৰু বনাঞ্চলত এই প্ৰযুক্তি অতি ফলপ্ৰসূ বুলি প্ৰমাণিত হৈছে।
ষ্টাৰলিংকে কম পৃথিৱীৰ কক্ষপথত ঘূৰি ফুৰা স্পেচএক্স উপগ্ৰহৰ পৰা ইণ্টাৰনেটৰ সুবিধা প্ৰদান কৰে। বৰ্তমান ৭ হাজাৰৰো অধিক ষ্টাৰলিংক উপগ্ৰহই কাম কৰি আছে। যাৰ সহায়ত দূৰৱৰ্তী অঞ্চললৈ ইণ্টাৰনেটৰ ব্যৱস্থা কৰা হৈছে। ইয়াক ব্যৱহাৰ কৰিবলৈ আপুনি আপোনাৰ ঘৰত এটা ৰিচিভাৰ (এন্টেনা) স্থাপন কৰিব লাগিব যিয়ে পোনপটীয়াকৈ উপগ্ৰহৰ সৈতে সংযোগ কৰিব আৰু ইণ্টাৰনেট প্ৰদান কৰিব। ইয়াৰ জৰিয়তে আপুনি আপোনাৰ মোবাইল, স্মাৰ্ট টিভি, লেপটপ আৰু কম্পিউটাৰ সংযোগ কৰিব পাৰিব।
চেটেলাইট ইন্টাৰনেটে পোনপটীয়াকৈ মোবাইল ফোনত কাম কৰিবনে?
আমি আগতে কোৱাৰ দৰে ইয়াক চলাবলৈ আপুনি আপোনাৰ ঘৰত এটা ৰিচিভাৰ স্থাপন কৰিব লাগিব। আপোনাৰ ডিভাইচসমূহ এই ৰিচিভাৰৰ সৈতে সংযোগ হ’ব আৰু আপুনি ইণ্টাৰনেট লাভ কৰিব। তথ্য অনুসৰি এই ৰিচিভাৰটো পৰ্টেবল হ’ব যিটো আপুনি যিকোনো ঠাইলৈ লগত লৈ যাব পাৰিব। ইয়াক চলাবলৈ বিদ্যুৎ সংযোগ বা বেটাৰীৰ প্ৰয়োজন হ’ব।
