By Good Assam
5G ৰ পিছত ভাৰতত 6G সেৱাৰ প্ৰস্তুতি চলি আছে। ইয়াৰ বাবে কেন্দ্ৰীয় চৰকাৰে ২০২৩ চনত ভাৰত ৬জি মিছন আৰম্ভ কৰিছিল । ভাৰতত ৬জি সেৱা আৰম্ভ কৰাৰ সন্দৰ্ভত কেন্দ্ৰীয় যোগাযোগ ৰাজ্যিক মন্ত্ৰীয়ে এটা ডাঙৰ বক্তব্য আগবঢ়াইছে।
৫জিৰ পিছত এতিয়া ভাৰতত ৬জি সেৱাৰ প্ৰস্তুতি চলি আছে। যি সময়ত বিশ্বৰ বহু দেশে এতিয়াও ৫জি সেৱাও আৰম্ভ কৰিব পৰা নাই, ভাৰতে ৬জিৰ দিশত খোজ দিছে। কেন্দ্ৰীয় যোগাযোগ ৰাজ্যিক মন্ত্ৰী চন্দ্ৰ শেখৰ পেম্মাছানীয়ে ভাৰতত কেতিয়া ৬জি সেৱা আৰম্ভ হ’ব সেই সন্দৰ্ভত তথ্য প্ৰদান কৰিছে । ইয়াৰ বাবে কেন্দ্ৰৰ মোডী চৰকাৰেও আৰম্ভ কৰিছে ইণ্ডিয়া ৬জি মিছন। ৫জিৰ দৰে ভাৰততো ৬জি মুকলি কৰা বিশ্বৰ প্ৰথম দেশসমূহৰ ভিতৰত অন্যতম হ’ব।
২০২২ চনত ভাৰতত ৫জি সেৱা আৰম্ভ কৰা হৈছিল। মাত্ৰ দুবছৰৰ ভিতৰতে ভাৰতত ৫জি নেটৱৰ্ক স্থাপন কৰা হৈছে। দেশৰ ৭৫০খন জিলাৰ ৯৮ শতাংশলৈ ৫জি নেটৱৰ্ক সম্প্ৰসাৰণ কৰা হৈছে। এয়াৰটেল আৰু জিঅ’ৰ পিছত VI ও মুকলি কৰিছে ৫জি সেৱা। একে সময়তে চৰকাৰী টেলিকম কোম্পানী বি এছ এন এলেও চলিত বৰ্ষৰ জুন মাহত ৫জি সেৱা আৰম্ভ কৰিব।
২০৩০ চনত মুকলি কৰা হ’ব ৬জি
কেন্দ্ৰীয় যোগাযোগ ৰাজ্যিক মন্ত্ৰীগৰাকীয়ে এক অনুষ্ঠানৰ সময়ত কয়, "ইণ্ডিয়া ৬জি মিছনৰ অধীনত আমি ২০৩০ চনৰ ভিতৰত ৬জি সেৱা অনাৰ প্ৰস্তুতি চলাইছো। আমি পৰৱৰ্তী প্ৰজন্মৰ যোগাযোগ প্ৰযুক্তিৰ ডিজাইন, বিকাশ আৰু নিয়োগৰ ক্ষেত্ৰত আগশাৰীৰ হ'ম আৰু ২০৩০ চনৰ ভিতৰত এই সেৱা আৰম্ভ কৰিম।"
