( অপূৰ্ব দাস )
বিশ্ব স্বাস্থ্য সংস্থা (WHO)ৰ তথ্য অনুসৰি ২০১৯ চনত হৃদযন্ত্ৰৰ ৰোগত আক্ৰান্ত হৈ আনুমানিক ১ কোটি ৭৯ লাখ লোকৰ মৃত্যু হৈছিল, যিটো বিশ্বজুৰি মুঠ মৃত্যুৰ ৩২%।
আপোনাৰ হৃদৰোগ আছে নে হাৰ্ট এটেক হ’বলৈ ওলাইছে নেকি সেইটো বুজিবলৈ এটা উপায় হ’ল প্ৰাৰম্ভিক লক্ষণসমূহ চিনাক্ত কৰা। এই লক্ষণসমূহে আপোনাৰ হৃদযন্ত্ৰৰ স্বাস্থ্য বুজিবলৈ সহায় কৰিব পাৰে আৰু আপুনি হাৰ্ট এটেক প্ৰতিৰোধৰ বাবে প্ৰয়োজনীয় পদক্ষেপ ল’ব পাৰে। হাৰ্ট এটেকৰ কিছু আগতীয়া সতৰ্কবাণীৰ তলত লক্ষণ আগবঢ়োৱা হ’ল -
• পুৰুষ আৰু মহিলা উভয়ৰে হাৰ্ট এটেকৰ লক্ষণ একেই। ইয়াক সাধাৰণতে বুকুত গধুৰতা, বুকুত চাপ বা টানি ধৰাৰ নিচিনা বুলি বৰ্ণনা কৰা হয়। এই বিষ কেইমিনিটমান থাকিব পাৰে বা আহিব আৰু যাব পাৰে। কান্ধ, বাহু, ডিঙি, পিঠি বা ককাললৈও বিয়পিব পাৰে।
• বিশেষকৈ বুকুৰ বিষ বা অস্বস্তিৰ লগত উশাহ-নিশাহ লোৱাত অসুবিধা হোৱাটো হাৰ্ট এটেকৰ গুৰুত্বপূৰ্ণ লক্ষণ। জিৰণি লোৱা বা লঘু কাম কৰি থকাৰ সময়তো এনে হ’ব পাৰে আৰু ইয়াৰ লগে লগে মূৰ ঘূৰোৱা বা মূৰটো ঘূৰৱাৰ দৰে অনুভৱ হ’ব পাৰে।
• হাৰ্ট এটেকৰ বিষ সদায় বুকুতে সীমাবদ্ধ নাথাকিবও পাৰে। পিঠি, কান্ধ, বাহু (বিশেষকৈ বাওঁহাত), ডিঙি বা ককালতো অনুভৱ কৰিব পাৰি। এই বিষ প্ৰায়ে বুকুৰ পৰাই উৎপত্তি হয় আৰু ইয়াক আন ধৰণৰ বিষ যেনে পেশীৰ বিষ বা গেছট্ৰিকৰ বাবে বুলি ভুলকৈ ধৰি লোৱা দেখা যায়।
• অত্যধিক ঘাম ওলোৱা, বিশেষকৈ ঠাণ্ডাত। ঘাম ওলোৱা হাৰ্ট এটেকৰ লক্ষণ হ’ব পাৰে। আপুনি নিজকে বেছি পৰিশ্ৰম নকৰিলেও আপোনাৰ শৰীৰত বহুত ঘাম ওলাব পাৰে। এই লক্ষণৰ লগত আন আন লক্ষণ যেনে বুকুৰ অস্বস্তি বা বমি ভাবও আহিব পাৰে।
• কিছু খোজ কাঢ়িলেই উশাহ-নিশাহ বৃদ্ধি পোৱা, মুখ-জীভা শুকাই যোৱা, পানীৰ পিয়াহ লগা আৰু অত্যাধিক ভাগৰ লগা হৈছে হাৰ্ট ৰোগীৰ লক্ষণ।
হৃদয় ৰোগৰ পৰা বাচিবলৈ কি কৰিব ?
• খোৱা খাদ্যৰ ওপৰত সাৱধান হ'ব। তেল-মচলা, চৰ্বি, মাছ-মাংস একেবাৰে কমকৈ খাব। ইয়াৰ পৰিৱৰ্তে বাদাম, আলিভ অইল ইত্যাদি ব্যৱহাৰ কৰিব। কাৰ্বহাইড্ৰেট কমকৈ খাব । শাক-পাচলি বেছিকৈ খাব।
• প্ৰতিদিনে ৰাতিপুৱা সূৰ্যৰ পোহৰ ল'ব আৰু ২০ মিনিট খোজ কঢ়া, চাইকেল চলোৱা ইত্যাদি সহজ ব্যায়াম কৰিব।
• পানী বেছিকৈ খাব , ইয়ে দেহত অক্সিজেন যোগান ধৰে।
• মানসিক চাপৰ পৰা দূৰত থাকিব আৰু দৈনিক ৬-৭ ঘন্টা টোপনি যাব।
• চিকিৎসকৰ পৰামৰ্শ ল'বলৈ নাপাহৰিব।
