( অপূৰ্ব দাস )
শীতকালত কম টোপনি, পানী নোখোৱা, অতিমাত্ৰা খাদ্য খোৱা বা খোজ নকঢ়া বা সৰু সৰু ব্যায়াম নকৰা আৰু বেয়া অভ্যাসৰ বাবে হাৰ্ট এটেকৰ সম্ভাৱনা যথেষ্ট বৃদ্ধি পায়। সেয়েহে হৃদৰোগীসকলে এই সময়ত অধিক সাৱধান হ’ব লাগে।
ঠাণ্ডা দিনত শৰীৰ গৰম কৰি ৰখাটো অতি প্ৰয়োজনীয়। সেয়ে শৰীৰ গৰম কৰি ৰাখিবলৈ সঠিক উষ্ণতাৰ বিশেষ যত্ন লোৱাটো অতি প্ৰয়োজনীয়। শীতকালত কম টোপনি, পানী কমকৈ খোৱা, অতিমাত্ৰা খাদ্য খোৱা বা বেয়া অভ্যাসৰ বাবে হাৰ্ট এটেকৰ সম্ভাৱনা যথেষ্ট বৃদ্ধি পায়। শীতকালেই হওক বা গ্ৰীষ্মকালেই হওক, আপুনি আপোনাৰ খাদ্য আৰু জীৱনশৈলীৰ বিশেষ যত্ন ল’ব লাগিব। আপুনি জানে যে হৃদযন্ত্ৰৰ কাম হ’ল আমাৰ শৰীৰৰ মাজেৰে তেজ পাম্প কৰা। শীতকালত যদি আপুনি শাৰীৰিক ক্ৰিয়া-কলাপ কমাই দিয়ে বা ব্যায়াম নকৰে তেন্তে আপোনাৰ স্বাস্থ্যৰ ওপৰত ইয়াৰ বেয়া প্ৰভাৱ স্পষ্টকৈ দেখা যায়।
হৃদৰোগীসকলে এই সময়ত অধিক সাৱধান হোৱা উচিত
হৃদৰোগীয়ে ৰাতিপুৱা ৬ বজাৰ পৰা ১০ বজাৰ ভিতৰত হৃদযন্ত্ৰৰ বিশেষ যত্ন ল’ব লাগে। সঠিক সময়ত খাদ্য গ্ৰহণ কৰক। খাদ্য আৰু জীৱনশৈলী অতি ভালকৈ ৰাখক। শীতকালত ৰক্তবাহী নলীবোৰ সংকুচিত হ’বলৈ আৰম্ভ কৰে। যাৰ বাবে তেজৰ চলাচল লেহেমীয়া হয়। ইয়াৰ কাৰণে হৃদযন্ত্ৰৰ ওপৰত চাপ পৰে। হৃদযন্ত্ৰৰ পেশীবোৰে পৰ্যাপ্ত পৰিমাণৰ অক্সিজেন নাপায় আৰু হাৰ্ট এটেক হোৱাৰ সম্ভাৱনা থাকে। পুৰুষৰ ৪৫ বছৰ বয়সৰ পিছত আৰু মহিলাৰ ৫৫ বছৰ বয়সৰ পিছত হাৰ্ট এটেক হোৱাৰ আশংকা থাকে যদিও আজিকালি কম বয়সীয়া সকলৰো হাৰ্ট এটেক হোৱা দেখা গৈছে।
হৃদৰোগীয়ে ৰাতিপুৱা নিজৰ বিশেষ যত্ন লোৱাটো প্ৰয়োজন :
ৰাতিপুৱা হাৰ্ট এটেকৰ আশংকা বৃদ্ধি পোৱাৰ আঁৰত বহু বৈজ্ঞানিক কাৰণ আছে। প্ৰথম কথা, আমি ৰাতি বেছি সময়লৈ টোপনি নোযোৱাকৈ থাকিলে আমাৰ শৰীৰত কৰ্টিছল নামৰ হৰম’নৰ মাত্ৰা বৃদ্ধি পায়। ‘ষ্ট্ৰেছ হৰম’ন’ বুলিও জনাজাত কৰ্টিছলে ৰক্তচাপ বৃদ্ধি কৰাৰ লগতে হৃদযন্ত্ৰক অধিক কষ্ট কৰিবলৈ বাধ্য কৰে, সেয়েহে আজিৰ সময়ত সৰু সৰু ল'ৰা-ছোৱালী বা ডেকা পুৰুষ-মহিলাৰো হাৰ্ট এটেক হ'য়, কাৰণ বহু ৰাতিলৈ উজাগৰে মʼবাইল চাই থাকে।
ইয়াৰ উপৰিও ৰাতিপুৱা শৰীৰৰ আভ্যন্তৰীণ চাৰ্কেডিয়ান ৰিদমেও হাৰ্ট এটেকৰ সম্ভাৱনাত প্ৰভাৱ পেলায়। এই সময়ত স্বাভাৱিকতে ৰক্তচাপ বৃদ্ধি পায়, আৰু ৰক্তবাহী নলীবোৰ অধিক সংকুচিত হৈ পৰে, যাৰ ফলত ৰক্ত সঞ্চালনত প্ৰভাৱ পৰে। ইয়াৰ উপৰিও ৰাতিপুৱা তেজত ফাইব্ৰিনোজেন নামৰ প্ৰটিনৰ মাত্ৰাও বেছি হয়, যাৰ ফলত তেজ ঘন হয় আৰু তেজ গোট খোৱাৰ সম্ভাৱনা বৃদ্ধি পায়। এই সকলোবোৰ কাৰকৰ একত্ৰিত প্ৰভাৱ থাকে, যাৰ বাবে ৰাতিপুৱা হাৰ্ট এটেকৰ সম্ভাৱনা বৃদ্ধি পায়। সেয়েহে ৰাতিপুৱা সোনকালে শুই উঠিব লাগে আৰু ব্যায়াম বা খোজ কঢ়িব লাগে।
হৃদয় ৰোগৰ লক্ষণসমূহ :
(১) মূৰ ঘূৰোৱা,
(২) বমি বমি লগা,
(৩) বুকুৰ মাজত বিষ,
(৪) চকুৰে আন্ধাৰ যেন দেখা,
(৫) অতি ভাগৰ লগা, বিশেষকৈ কাম কৰিলে, খোজ কঢ়িলে বা চাইকেল চলালে।
এনে লক্ষণ দেখিলে অতি সোনকালে চিকিৎসকৰ পৰামৰ্শ ল'ব।
