( অপূৰ্ব দাস )
ঘৰখন পৰিস্কাৰকৈ ৰাখিলে আনৰ পৰা প্ৰশংসা পোৱাৰ লগতে ইয়ে পৰিয়ালৰ স্বাস্থ্য ৰক্ষাতো সহায় কৰে। ঘৰ সদায় পৰিস্কাৰ কৰিলে ঘৰখনৰ পৰা বীজাণু আঁতৰ হয়। বাস্তু শাস্ত্ৰতো কয় যে ঘৰখনৰ পৰিস্কাৰ-পৰিচ্ছন্নতা সদায় কৰিলে অশুভ প্ৰভাৱ সমূহ দূৰ হয় ; ঘৰলৈ পজিটিভ শক্তিৰ সোঁত বয়। কিন্তু এটা কথা মন কৰিছেনে? প্ৰায়ে ঘৰ পৰিস্কাৰ কৰি কৰি ভাগৰি পৰে এটা কাৰণতেই, সেয়া হৈছে মকৰাৰ জাল।
প্ৰত্যেকৰে ঘৰত এই মকৰা জালেই অধিক অশান্তি দিয়ে। পৰিস্কাৰ কৰিলেও ২-৩ দিনৰ ভিতৰতে আকৌ মকৰা জাল বান্ধে। শাস্ত্ৰতো আছে যে মকৰা লক্ষ্মীৰ শত্ৰু। মকৰা জাল থকা ঘৰত লক্ষ্মী আই নাথাকে। অৰ্থাৎ মকৰা জাল থাকিলে ঋণাত্মক শক্তি ঘৰখনত থাকে। সেয়েহে ইয়াক আঁতৰাবলৈ এক সুন্দৰ পদ্ধতি আপোনালৈ লৈ আহিছোঁ, কাৰণ এই পদ্ধতি আমাৰ ঘৰতেই ব্যৱহাৰ কৰি সুফল পোৱা গৈছে।
আহক তেনেহʼলে এই পদ্ধতিৰ বিষয়ে আপোনাক জনাও-
(১) আপুনি প্ৰথমে নাৰিকলৰ বাকলি বা কোমল কাঠ নাইবা ঢিলা গছৰ খৰি যোগাৰ কৰিব। ভালদৰে ৰ'দত শুকুৱাই লৈ
সৰু সৰু টুকুৰাকৈ ( ১ ইঞ্চি মান) কাটিব।
(২) নিম পাত থাকিলে তাকো শুকুৱাই ল'ব। বজাৰৰ পৰা শাল ধূনা আনিব। ধূনাখিনি গুড়ি কৰি ল'ব।
(৩) ধূনা জ্বলৱা এটা পাত্ৰ ( মাটিৰ পাত্ৰ কিনিবলৈ পোৱা যায়) ল'ব।
(৪) গধূলিৰ সময়ত কাঠৰ টুকুৰা বা নাৰিকলৰ বাকলি ধূনামলাটোত জ্বলাই নিম পাত আৰু শাল ধূনা দিব। যেতিয়া ধোৱা ওলাব তেতিয়া মন্দিৰত গৈ ভগৱানক সেৱা কৰি ক'ব - যে "হে প্ৰভু, আমাৰ ঘৰখনৰ সকলো অশুভ প্ৰভাৱ দূৰ হয় যেন। " এই বুলি কৈ " ঔম হং হনুমতে নমঃ" মন্ত্ৰটি উচ্চাৰণ কৰি কৰি ঘৰৰ প্ৰতিটো কোঠাত ধোৱা দিব।
(৫) এনেদৰে ১৪ টা দিন দিলেই সম্পূৰ্ণ ৰূপে মকৰাৰ লগতে ঘৰৰ অশুভ প্ৰভাৱ সমূহো আঁতৰ হ'ব।
(৬) মহ খেদাৰো ই হৈছে উত্তম উপায়। বৰ্তমান সময়ত ডেংগু, মেলেৰিয়া আদিৰ দৰে ৰোগৰ প্ৰাদুৰ্ভাৱ বাঢ়িছে। এনেদৰে প্ৰতিদিনে শাল ধূনাৰ ধোৱা দিলে এইবোৰ বেয়া প্ৰভাৱ আঁতৰ হ'য়।
