( অপূৰ্ব দাস )
আঘোণৰ পঠাৰৰ ধান দাই শেষ হোৱাৰ পিছত ন-খোৱাৰ পৰম্পৰা আমাৰ অসমীয়া সমাজত আছে। শীতৰ আগমনৰ লগে লগে তেলাল হাঁহ- কুকুৰা আদি খোৱাৰ মজাই বেলেগ। শীতৰ এই সময়ত আমাক প্ৰ'টিন আৰু চৰ্বিৰ খুবেই প্ৰয়োজন। কিয়নো, এই সময়ত ছাল-চুলি শুকান হোৱা দূৰ কৰাৰ লগতে শীতৰ প্ৰকোপৰ পৰা ৰক্ষা পাবলৈ আমাৰ শৰীৰক চৰ্বিৰ বহু প্ৰয়োজন হয়। মাঘৰ মাহত তিল-নাৰিকলৰ পিঠা সেইবাবেই খোৱা হয়। লগতে বতৰৰ ফল-মূল , শাক-পাচলিও খোৱা অতি প্ৰয়োজন। ইয়ে আমাৰ ৰোগ প্ৰতিৰোধ ক্ষমতা বৃদ্ধি কৰে। সেয়েহে আজি আপোলোকলৈ লৈ আহিছো মই কুকুৰাৰ মাংসৰে Chilli Chicken ৰেচিপি। এই ৰেচিপিটো আপুনি ঘৰত এনেদৰে ৰান্ধিবলৈ চেষ্টা কৰিব ।
উপকৰণ :
500 গ্রাম বোনলেস চিকেন
2টো ডাঙৰ পিঁয়াজ
1 টা ডাঙৰ ক্যাপচিকাম
4 টেবল চামুচ পিঁয়াজ মিহিকৈ কুটা
1 টেবল চামুচ নহৰু মিহিকৈ কুটা
2 টেবল চামুচ আদা-নহৰু পিহা
সোৱাদ অনুসৰি নিমখ
½চা চামচ কাশ্মীৰি জলকীয়াৰ গুড়ি
1 টেবল চামুচ টমেটো চচ
1 টেবল চামুচ চয়া চচ
1 টেবিল চামুচ গ্রীন চিলি চচ
1 চামুচ ভিনেগাৰ
6 টেবল চামুচ কর্নফ্লোৰ
2 টেবল চামুচ ময়দা
এটুকুৰা বাটাৰ
1 টা কণী
4 টা কেঁচা জলকীয়া
2 কাপ তেল
2 কাপ পানী
ৰন্ধন প্ৰণালী:
• কুকুৰাৰ মাংস খিনি পৰিষ্কাৰ কৰি ধুই লওক, তাৰ পিছত এটা বাটিত লৈ কণী, ১ চামুচ আদা-নহৰুৰ পেষ্ট, কৰ্ণফ্লোৰ, ময়দা, জলকীয়াৰ গুড়ি, হালধি গুড়ি আৰু অলপ নিমখৰ সৈতে ভালদৰে মিহলাই ৩০ মিনিট মেৰিনেট কৰি লওক।
• 30 মিনিট পিছত তেলত ৰঙচুৱাকৈ কম জুইত ভাঁজিব।
• আনফালে এটা বাটিত একাপ পানী লৈ তাতে টমেটো চচ , চয়া চচ, গ্রীন চিলি চচ আৰু 2 চামুচ কর্নফ্লোৰ দি ভালকৈ মিহলাই থৈ দিব।
• এতিয়া কেৰাহীত 2 টেবল চামুচ ৰন্ধন তেল গৰম কৰি তাতে নহৰু কুটা সামান্য ৰঙচুৱাকৈ ভাজিব । এতিয়া তাৰ ওপৰত ডাঙৰ কৈ কটা পিঁয়াজ আৰু ক্যাপচিকাম কটা দি সামান্য ৰঙচুৱাকৈ ভাজিব।
• অলপ ভজা হ'লে পানীৰে ঘোল তৈয়াৰ কৰি ৰখা চচ,কর্নফ্লোৰ আৰু পানীৰ মিশ্ৰৰটি তাতে দিব। আকৌ অলপ কাশ্মীৰৰ জলকীয়া গুড়গ দি উতলি উঠা পর্যন্ত অপেক্ষা কৰিব। মিশ্রণটি উতলি আহিবলৈ আৰম্ভ কৰিলে- দিব স্বাদ অনুসৰি নিমখ আৰু এক কাপ পানী দি ভালকৈ ১ মিনিট উতলাই থাকিব।
• গ্রেভি উতলি উঠিলে তাতে দিব ভাজি ৰখা চিকেনেৰ ( মাংস) টুকুৰাবোৰ। ইয়াৰ পিছত আকৌ ১ মিনিট উতলাই থাকিব।
• এক মিনিটৰ পিছত ওপৰত সজাই দিব কেঁচা পিঁয়াজৰ টুকুৰা আৰু ওলপ বাটাৰ।
• ভালকৈ মিশ্রণটি মিহলি কৰি নমাই থব। নুডলচ , ফ্রাইড ৰাইচ নাইবা ৰুটিৰ লগত গৰমে গৰমে পৰিৱেশন কৰিব। শীতৰ এই সময়ত খাই মজা পাব।
