By Good Assam || December 18, 2024
ৰাছিয়াই প্ৰস্তুত কৰিলে কেন্সাৰ ভেকচিন, যাৰ তথ্য ৰাছিয়াৰ এটা সংবাদ সংস্থাই দিছে। এই ভেকচিন ২০২৫ চনৰ প্ৰথম মাহত বজাৰত উপলব্ধ হ’ব বুলি কৈছে। ইয়াক mRNA প্ৰযুক্তি ব্যৱহাৰ কৰি প্ৰস্তুত কৰা হৈছে।
কেন্সাৰ নাম শুনাৰ লগে লগে মানুহে ভয় খায়, কাৰণ ই এক গুৰুতৰ ৰোগ য’ত ৰোগীয়ে প্ৰাণ হেৰুৱাৰ আশংকা থাকে। ইয়াৰ চিকিৎসা ব্যয়বহুল হোৱাৰ বাবে ৰোগীয়ে প্ৰায়ে আশা এৰি দিয়ে। কিন্তু এতিয়া ৰাছিয়াৰ পৰা আহিছে এক সকাহৰ খবৰ। ৰাছিয়াৰ সংবাদ সংস্থা TASS ৰ মতে ৰাছিয়াই কৰ্কট ৰোগৰ ভেকচিন প্ৰস্তুত কৰি উলিয়াইছে।
ৰাছিয়াৰ স্বাস্থ্য মন্ত্ৰালয়ৰ ৰেডিঅ’লজি মেডিকেল ৰিচাৰ্চ চেণ্টাৰৰ সঞ্চালক জেনেৰেল আন্দ্ৰেই কাপ্ৰিনে কয় যে এই mRNA ভেকচিন কৰ্কট ৰোগৰ বিৰুদ্ধে যুঁজিবলৈ প্ৰস্তুত কৰা হৈছে। বহু গৱেষণা কেন্দ্ৰৰ পাৰস্পৰিক সহযোগিতাৰে ইয়াক নিৰ্মাণ কৰা হৈছে।
• কেন্সাৰ ভেকচিনৰ ট্ৰায়েল
আন্দ্ৰেই কাপ্ৰিনে সংবাদ মাধ্যমৰ আগত কয় যে এই ভেকচিনৰ প্ৰি-ক্লিনিকেল ট্ৰায়েল সফল হৈছে। এই পৰীক্ষাত দেখা গ’ল যে এই ভেকচিনে টিউমাৰৰ বৃদ্ধি ৰোধ কৰে আৰু লগতে কেন্সাৰ বিয়পোৱাৰ প্ৰক্ৰিয়াও নিয়ন্ত্ৰণ কৰে। তেওঁ কয় যে " আশাকৰোঁ, ২০২৫ চনৰ আৰম্ভণিতে এই ভেকচিন ৰোগীৰ বাবে উপলব্ধ হ’ব। ইয়াক ৰাছিয়াত সম্পূৰ্ণ বিনামূলীয়াকৈ উপলব্ধ কৰা হ’ব।"
ৰাছিয়াৰ ৰাষ্ট্ৰপতি পুটিনেও এই সন্দৰ্ভত এক বিবৃতি দিয়ে। তেওঁ কয় যে কৰ্কট ৰোগৰ চিকিৎসাৰ বাবে ভেকচিন আৰু ইমিউন’মডুলেটৰী ঔষধ নিৰ্মাণৰ ক্ষেত্ৰত দেশখন অতি ওচৰ চাপিছে। তেওঁ আশা কৰিছে যে এই নতুন প্ৰযুক্তিয়ে ব্যক্তিগত চিকিৎসাক অধিক ফলপ্ৰসূ কৰি তুলিব।
mRNA কেন্সাৰ ভেকচিনে কেনেকৈ কাম কৰিব?
এই mRNA ভেকচিনে শৰীৰক এক বিশেষ সংকেত দিব, যিয়ে শৰীৰৰ কোষক বিশেষ প্ৰ’টিন তৈয়াৰ কৰিবলৈ ক’ব। এই প্ৰটিন কেন্সাৰ কোষৰ দৰে হ’ব। এই প্ৰটিনে শৰীৰৰ ৰোগ প্ৰতিৰোধ ক্ষমতাক ভাবুকি হিচাপে অনুভৱ কৰি ইয়াৰ বিৰুদ্ধে এন্টিব’ডি উৎপন্ন কৰে। এই এন্টিব’ডিবোৰে প্ৰকৃত কেন্সাৰ কোষবোৰ চিনি পায় আৰু সেইবোৰক আক্ৰমণ কৰি ধ্বংস কৰে।
