কিয় ? ইয়াৰ ফলত মৃত্যু মুখত পৰিব পাৰে সাৱধান!
( অপূৰ্ব দাস )
আপুনি জানেনে যে শীতকালত উচ্চ ৰক্তচাপৰ সমস্যা হ’ব পাৰে? হয়, সঁচাকৈয়ে এনেকুৱা হয় আৰু ই যথেষ্ট সাধাৰণ কথা, কিন্তু যদি ইয়াক নিয়ন্ত্ৰণ কৰা নহয় বা আমি ইয়াৰ প্ৰতি গুৰুত্ব নিদিওঁ, তেন্তে ইয়াৰ পৰিণতি যথেষ্ট বিপদজনক হ’ব পাৰে। ইয়াত আপুনি জানিব পাৰিম যে শীতকালত ৰক্তচাপ কিয় বৃদ্ধি পায় আৰু ইয়াৰ লক্ষণসমূহ।
শীতকালৰ বতৰটোৱে কেৱল পৰিৱেশৰ ওপৰত প্ৰভাৱ পেলোৱাই নহয় আমাৰ স্বাস্থ্যৰ ওপৰতো প্ৰভাৱ পেলায়। উষ্ণতা কম হোৱাৰ বাবে স্বাস্থ্য সম্পৰ্কীয় বহু সমস্যাৰ সৃষ্টি হ’ব পাৰে, য’ত কেৱল চৰ্দি-জ্বৰেই নহয়, উচ্চ ৰক্তচাপও অন্তৰ্ভুক্ত। হয়, ঠাণ্ডাৰ সময়ত ৰক্তচাপৰ উঠা-নমা হ’ব পাৰে। সেয়েহে এই বতৰত বহু লোকে উচ্চ ৰক্তচাপৰ সমস্যাৰ সন্মুখীন হ’বলগীয়া হয়। শীতকালত কিয় ৰক্তচাপ বৃদ্ধি পায় আৰু ইয়াৰ লক্ষণ কি জানিবলৈ পঢ়িব -
শীতকালত ৰক্তচাপ বৃদ্ধি পোৱাৰ কাৰণ কি ?
• ৰক্তবাহী নলী সংকুচিত হ'য়:
ঠাণ্ডা বতৰত শৰীৰৰ উষ্ণতা বজাই ৰাখিবলৈ ৰক্তবাহী নলী সংকুচিত হয়। এনে হোৱাৰ কাৰণ যাতে শৰীৰৰ পৰা তাপ ক্ষয় কমি যায় আৰু ই ঠাণ্ডা প্ৰতিৰোধ কৰাত সহায় কৰে, কিন্তু ইয়াৰ বাবে তেজৰ সঞ্চালন লেহেমীয়া হয় আৰু ৰক্তবাহী নলীৰ বেৰত অধিক চাপ পৰে। ইয়াৰ কাৰণে ৰক্তচাপ বাঢ়ি যায় আৰু হৃদযন্ত্ৰই তেজ পাম্প কৰিবলৈ অধিক কষ্ট কৰিবলগীয়া হয়। ইয়াৰ বাবেই হাৰ্ট এটেক বা ষ্ট্ৰোকও হ’ব পাৰে।
• শাৰীৰিক ক্ৰিয়া-কলাপ কমি যায় :
শীতকালত কিছুমান মানুহক কমকৈ কাম কৰা দেখা যায় আৰু শাৰীৰিক ক্ৰিয়া-কলাপ কম কৰে। ইয়াৰ বাবে ওজন বৃদ্ধিৰ সমস্যা হ’য় আৰু কলেষ্টেৰল বৃদ্ধি পায় , যাৰ ফলত উচ্চ ৰক্তচাপৰ সমস্যা হ’ব পাৰে।
• বেছিকৈ নিমখ আৰু চেনি খোৱা :
শীতকালত নিজকে গৰম কৰি ৰাখিবলৈ আমি অত্যধিক খাদ্য খাওঁ, য’ত চেনি আৰু নিমখৰ পৰিমাণ বেছি থাকে। অধিক পৰিমাণৰ নিমখ আৰু চেনিৰ বাবে ৰক্তচাপ বৃদ্ধি পাব পাৰে। সেয়েহে চেনি যুক্ত আৰু নিমখ থকা খাদ্য কমকৈ খাব।
• মানসিক চাপ :
শীতকালত সূৰ্যৰ পোহৰ কম হয়, যাৰ বাবে ভিটামিন ডি কম পোৱা যায়। ইয়াৰ বাবে মানসিক চাপ আৰু হতাশাৰ দৰে সমস্যাৰ সৃষ্টি হ’ব পাৰে। মানসিক চাপ বৃদ্ধিৰ বাবেও ৰক্তচাপ বৃদ্ধি পাব পাৰে।
ৰক্তচাপ বৃদ্ধিৰ লক্ষণসমূহ :
সাধাৰণতে ৰক্তচাপ বৃদ্ধিৰ কোনো অস্বাভাৱিক লক্ষণ দেখা নাযায়, যাৰ বাবে কেতিয়াবা সময়মতে ধৰা নপৰে, কিন্তু ইয়াৰ কিছুমান লক্ষণ এনেকুৱা হ’ব পাৰে-
• মূৰৰ বিষ
• মূৰ ঘুৰণি
• নাকৰ পৰা তেজ ওলোৱা
• দৃষ্টিশক্তি অস্পষ্ট
• ভাগৰ
• উশাহ লোৱাত অসুবিধা হোৱা
• বুকুৰ বিষ বা গধুৰতা অনুভৱ কৰা
ৰক্তচাপ কেনেকৈ নিয়ন্ত্ৰণ কৰিব?
• স্বাস্থ্যসন্মত খাদ্য গ্ৰহণ কৰক :
ফলমূল, শাক-পাচলি, গোটা শস্য আৰু কম চৰ্বিযুক্ত দুগ্ধজাত সামগ্ৰী খাদ্য তালিকাত অন্তৰ্ভুক্ত কৰক আৰু নিমখ আৰু চেনিৰ পৰিমাণ কম কৰক। মাছ ,মাংস, কণী , মচলা, তেলৰ পৰিমাণ একেবাৰে কম কৰক।
• ওজন কম কৰক :
যদি আপোনাৰ ওজন বেছি হয় তেন্তে ওজন কমাবলৈ চেষ্টা কৰক। শাৰীৰিকভাৱে সক্ৰিয় হওক- দৈনিক কমেও ৩০ মিনিট ব্যায়াম কৰক। আৰাম কৰি বহি থকা স্বভাৱ ত্যাগ কৰক, সৰু সৰু কিছুমান কাম কৰক। দিনৰ ভাগত শুব নালাগে।
• মানসিক চাপ হ্ৰাস কৰক :
যোগাসন, ধ্যান বা আন মানসিক চাপ হ্ৰাস কৰা কৌশলৰ অভ্যাস কৰক।
• মদ আৰু ধূমপান পৰিহাৰ কৰক :
মদ্যপান আৰু ধূমপান কৰিলে ৰক্তচাপ বৃদ্ধি পাব পাৰে।
• ঠাণ্ডাৰ পৰা নিজকে ৰক্ষা কৰক :
গৰম কাপোৰ পিন্ধক আৰু ঘৰটো গৰম কৰি ৰাখক। বাহিৰলৈ ওলাই যোৱাৰ সময়ত মূৰ আৰু কাণ ঢাকি ৰাখক। বিশেষকৈ বুকুত ঠাণ্ডা লাগিবলৈ নিদিব।
• প্ৰতিদিনে ৰক্তচাপ পৰীক্ষা কৰক:
ডাক্তৰৰ পৰামৰ্শমতে প্ৰতিদিনে ৰক্তচাপ পৰীক্ষা কৰক।
• চিকিৎসকৰ পৰামৰ্শ লওক- যদি আপোনাৰ উচ্চ ৰক্তচাপ আছে তেন্তে চিকিৎসকৰ পৰামৰ্শ লওক আৰু নিয়মিতভাৱে নিজৰ পৰীক্ষা কৰক। যিকোনো ঔষধ খোৱাৰ আগতে চিকিৎসকৰ পৰামৰ্শ ল'ব।
• গেছ আৰু গেছট্ৰিকৰ সমস্যা:
গেছ আৰু গেছট্ৰিকৰ সমস্যা থাকিলেও উচ্চ ৰক্তচাপ বৃদ্ধি পায়। সেয়েহে এনে খাদ্য নাখাব যাৰ দ্বাৰা গেছ আৰু গেছট্ৰিকৰ সমস্যা বৃদ্ধি পায়।
এনেবোৰ খাদ্য এৰাই চলিব - তেলেতীয়া খাদ্য, চেনি থকা খাদ্য, মাছ-মাংস, তেঙা খাদ্য, জলকীয়া, মচলা, শুকান মাছ, অত্যাধিক নিমখ থকা খাদ্য, কচু, কবি, উৰহী, মূলা, গাখীৰ, কেঁচা পিয়াঁজ ইত্যাদি।
উচ্চ ৰক্তচাপ কম কৰাৰ কিছুমান আয়ুৰ্বেদিক ঔষধ :
ণহৰু :
উচ্চ ৰক্তচাপ নিয়ন্ত্ৰণত ণহৰু ফলপ্ৰসূ। ইয়াত থকা এলিচিনে শৰীৰত বৃদ্ধি পোৱা ৰক্তচাপৰ মাত্ৰা হ্ৰাস কৰাত সহায় কৰে। ইয়াৰ বাবে প্ৰতিদিনে ৰাতিপুৱা খালী পেটত ১-২ কোহ ণহৰু খাব পাৰে। ইয়াৰ নিয়মীয়া সেৱনে উচ্চ বি পি আৰু কলেষ্টেৰলৰ সমস্যাৰ পৰা উপশম পাব পাৰে।
• আমলখি
আমলখিত ভিটামিন চি আৰু এন্টিঅক্সিডেন্ট প্ৰচুৰ পৰিমাণে পোৱা যায়, যিয়ে শৰীৰৰ পৰা বিষাক্ত পদাৰ্থ নিৰ্মূল কৰাত সহায় কৰে। উচ্চ ৰক্তচাপ নিয়ন্ত্ৰণত আমলখি সেৱন অতি উপকাৰী বুলি প্ৰমাণিত । প্ৰতিদিনে পুৱা খালী পেটত আমলখিৰ ৰস সেৱন কৰিলে উচ্চ ৰক্তচাপ আৰু কলেষ্টেৰলৰ মাত্ৰা নিয়ন্ত্ৰণত সহায়ক হয়। তদুপৰি স্বাস্থ্যইও বহু উপকাৰ লাভ কৰে।
• অৰ্জুন গছৰ ছাল
অৰ্জুন গছৰ বাকলি আয়ুৰ্বেদিক বনৌষধি, যি উচ্চ ৰক্তচাপ আৰু কলেষ্টেৰল নিয়ন্ত্ৰণ কৰে বুলি জনা যায়। নিয়মিতভাৱে এই গছৰ ছালৰ চাহ সেৱনে ৰক্তবাহী নলীত সঠিক প্ৰবাহ বজাই ৰখাত সহায় কৰে, যাৰ ফলত ৰক্তচাপ নিয়ন্ত্ৰণ হয়।
• তুলসী
তুলসীৰ পাত ঔষধি গুণেৰে ভৰপূৰ। ই উচ্চ ৰক্তচাপ নিয়ন্ত্ৰণত ফলপ্ৰসূ বুলি বিবেচিত হয়। ইয়াত পোৱা ইউজেনলে কেলচিয়াম চেনেল ব্লকাৰ হিচাপে কাম কৰে। ই হৃদযন্ত্ৰ আৰু ধমনীৰ বেৰত কেলচিয়াম জমা হোৱাত বাধা দিয়ে, যাৰ ফলত ৰক্তবাহী নলীবোৰ শিথিল হয়। ২ খন তুলসীৰ পাত চোবাই খালে বা তুলসী পাতৰ চাহ খালে ৰক্তচাপ নিয়ন্ত্ৰণত সহায়ক হয়।
• অশ্বগন্ধা আৰু সৰ্পগন্ধা
ৰক্তচাপ নিয়ন্ত্ৰণৰ বাবে অশ্বগন্ধা আৰু সৰ্পগন্ধা ফলপ্ৰসূ আয়ুৰ্বেদিক ঔষধ। ইয়াত মানসিক চাপ নিৰাময়কাৰী গুণ পোৱা যায়। মানসিক চাপো উচ্চ ৰক্তচাপৰ এটা প্ৰধান কাৰণ। যদি আপোনাৰ উচ্চ ৰক্তচাপৰ সমস্যা আছে তেন্তে প্ৰতিদিনে শুই উঠাৰ আগতে গাখীৰৰ লগত মিহলি কৰি এচামুচ অশ্বগন্ধা নাইবা সৰ্পগন্ধাৰ গুড়ি সেৱন কৰিব পাৰে। অৱশ্যে ব্যৱহাৰ কৰাৰ আগতে চিকিৎসকৰ পৰামৰ্শ লওক।
• তিতা কেৰেলা
যিসকল লোকৰ উচ্চ ৰক্তচাপ আছে তেওঁলোকে তিতা কেৰেলা খাব পাৰে। তিতা কেৰেলা খালেও উচ্চ ৰক্তচাপ কমি যায়। কিন্তু মনত ৰাখিব - গেছ আৰু গেছট্ৰিকৰ সমস্যা থাকিলে ইয়াক খাব নালাগে।
