( অপূৰ্ব দাস )
মেলেৰিয়া - মেলেৰিয়া মহৰ দ্বাৰা হোৱা এক ভয়াৱহ ৰোগ, ইয়াৰ ক্ৰমবৰ্ধমান বিপদৰ প্ৰতি লক্ষ্য ৰাখি ইয়াক ভালদৰে সুৰক্ষা দিয়াটো গুৰুত্বপূৰ্ণ। এই লেখাটোত আপোনালোকক মেলেৰিয়া প্ৰতিৰোধৰ উপায়ৰ বিষয়ে ক’ম।
মেলেৰিয়া হৈছে এক গুৰুতৰ আৰু মাৰাত্মক ৰোগ, যিটো প্লাজমোডিয়াম নামৰ পৰজীৱীৰ দ্বাৰা বিয়পে। এই পৰজীৱী সংক্ৰমিত এনোফিলিছ মহৰ কামোৰৰ জৰিয়তে মানুহৰ শৰীৰত প্ৰৱেশ কৰে। মেলেৰিয়াৰ লক্ষণসমূহ হ’ল জ্বৰ, মূৰৰ বিষ, ঠাণ্ডা লগা , ঘাম আৰু শৰীৰৰ বিষ। মেলেৰিয়া প্ৰতিৰোধৰ বাবে শুদ্ধ তথ্য আৰু সাৱধানতা গুৰুত্বপূৰ্ণ।
বিশেষজ্ঞসকলে কয় যে মেলেৰিয়া এক বিপজ্জনক ৰোগ, কিন্তু উপযুক্ত প্ৰতিৰোধমূলক ব্যৱস্থা গ্ৰহণ কৰিলে ইয়াৰ পৰা হাত সাৰিব পাৰি। মহৰ কামোৰ পৰিহাৰ কৰি, প্ৰজনন স্থান নাইকিয়া কৰি, মেলেৰিয়া প্ৰতিৰোধী ঔষধ সেৱন কৰি, পৰিষ্কাৰ-পৰিচ্ছন্নতা আৰু সময়মতে চিকিৎসা বজাই ৰাখি, এই সকলোবোৰ ব্যৱস্থাৰ জৰিয়তে আমি মেলেৰিয়াৰ বিস্তাৰ নিয়ন্ত্ৰণ কৰি নিজৰ আৰু আনৰ সুৰক্ষা নিশ্চিত কৰিব পাৰো। ইয়াত আপোনালোকক মেলেৰিয়া প্ৰতিৰোধৰ পাঁচটা ফলপ্ৰসূ উপায় কৈছো।
• মেলেৰিয়া প্ৰতিৰোধৰ বাবে মহৰ বিৰুদ্ধে সাৱধানতা অৱলম্বন কৰাটো প্ৰয়োজনীয়
মেলেৰিয়া বিয়পি পৰাত মহে মুখ্য ভূমিকা পালন কৰে, গতিকে মহৰ সুৰক্ষাই আটাইতকৈ গুৰুত্বপূৰ্ণ পদক্ষেপ। গতিকে ৰাতি শুই থকাৰ সময়ত আঁঠুৱা ব্যৱহাৰ কৰিলে মহৰ পৰা ৰক্ষা পাবলৈ আটাইতকৈ ফলপ্ৰসূ উপায়। আঁঠুৱাৰে
শুই থাকিলে মহ শৰীৰত উপনীত হোৱাত বাধা হয়। লগতে মহ আঁতৰাই ৰাখিবলৈ শৰীৰৰ উন্মুক্ত অংশত মহ প্ৰতিৰোধী ক্ৰীম (যেনে DEET) ব্যৱহাৰ কৰিব লাগে। গধূলিৰ সময়ত সদায় শালধূনা প্ৰয়োগ কৰা উচিত। ইয়াত নিমপাত ব্যৱহাৰ কৰি মহ আঁতৰ কৰা উচিত।
• মহৰ প্ৰজনন স্থান নাইকিয়া কৰা
মহে কেৱল পানীতহে কণী পাৰে, গতিকে ওচৰতে পানী জমা হোৱা ঠাইবোৰ নাইকিয়া কৰাটো গুৰুত্বপূৰ্ণ। এই ব্যৱস্থাই মেলেৰিয়াৰ সংক্ৰমণ হ্ৰাস কৰাত সহায় কৰে। গতিকে বাচন-বৰ্তন, টায়াৰ, বাল্টি, পাত্ৰ আদিত পানী নাৰাখিব, যাতে মহে এই ঠাইবোৰত কণী নপৰে। পানী জমা হোৱা গাতবোৰ পুতি পেলাব লাগে, যাতে তাত মহে কণী পাৰিব নোৱাৰে।
• পৰিষ্কাৰ-পৰিচ্ছন্নতা বজাই ৰাখিব লাগে
পৰিষ্কাৰ-পৰিচ্ছন্নতা মানি চলিলে মেলেৰিয়াৰ সংক্ৰমণ ৰোধ কৰিব পাৰি। মহৰ প্ৰজনন স্থান পৰিষ্কাৰ-পৰিচ্ছন্নতাৰ দ্বাৰা নিয়ন্ত্ৰণ কৰিব পাৰি, লগতে মহৰ পৰা শৰীৰ ৰক্ষা কৰিব লাগিব । গতিকে ঘৰৰ ভিতৰৰ আৰু বাহিৰৰ ঠাইবোৰ পৰিষ্কাৰ কৰি ৰাখিব লাগে, যেনে জাবৰ, ভঙা বাচন-বৰ্তন আৰু লেতেৰা ঠাইৰ পৰা আঁতৰি থাকিব লাগে। লগতে পানী বীজাণুমুক্ত কৰাটোও গুৰুত্বপূৰ্ণ, যাতে ইয়াত মহে প্ৰজনন কৰিব নোৱাৰে।
• স্বাস্থ্য পৰীক্ষা আৰু চিকিৎসা
জ্বৰ হ'লেই তেজ পৰীক্ষা কৰাটো অতি প্ৰয়োজনীয়, তেতিয়া বিপদ কম হ'য়। পলম নকৰি ওচৰৰ স্বাস্থ্য কেন্দ্ৰলৈ গৈ তেজ পৰীক্ষা কৰা উচিত। মেলেৰিয়াৰ লক্ষণ যেনে জ্বৰ, মূৰৰ বিষ, ঠাণ্ডা, পেশীৰ বিষ আদি দেখা দিলে তৎক্ষণাত মেলেৰিয়াৰ পৰীক্ষা কৰাব লাগে। আগতীয়াকৈ চিকিৎসা কৰিলে গুৰুতৰ সংক্ৰমণ আৰু জটিলতা ৰোধ কৰিব পাৰি। মেলেৰিয়াৰ চিকিৎসা সঠিক সময়ত কৰিব লাগে, গতিকে চিকিৎসকে দিয়া ঔষধ শুদ্ধকৈ খাব লাগে।
******************************************
বাতৰিৰ শিৰোনাম দখল কৰে :
কোকৰাঝাৰত জিলাত ভয়াৱহ ৰূপ ধাৰণ কৰিছে মেলেৰীয়া ৰোগে। জিলাখনত মেলেৰীয়া ৰোগত আক্ৰান্ত হোৱা ৰোগীৰ সংখ্যা হ'ল ১৭৮৯ গৰাকী হৈছেগৈ আৰু ক্ৰমান্বয়ে ৰোগীৰ সংখ্যা বাঢ়ি আছে। তদুপৰি মেলেৰীয়া ৰোগত আক্ৰান্ত হৈ জিলাখনত পাঁচগৰাকী শিশুৰ মৃত্যু হোৱা বুলি অভিযোগ উঠিছে । আনহাতে এগৰাকী উচ্চশিক্ষিত যুৱকৰো মৃত্যু হৈছে। কোকৰাঝাৰ জিলাৰ ভাৰত-ভূটান সীমান্তৱৰ্তী লুংচুং এলেকাত মেলেৰীয়াই আটাইতকৈ ভয়াৱহ ৰূপ ধাৰণ কৰিছে। অকল লুংচুং এলেকাতে ৫৯২ গৰাকী লোক মেলেৰিয়াত আক্ৰান্ত হৈছে ।
৫৯২ গৰাকী মেলেৰিয়া আক্ৰান্তৰ ভিতৰত প্লাছমোডিয়াম ফেলচিফেৰাম (pf) বীজাণুৰ দ্বাৰা মেলেৰীয়া হোৱা ৰোগীৰ সংখ্যা ৩৯৮ গৰাকী আৰু প্লাছমোডিয়াম ভাইভেক্স(pv) বীজাণুৰ দ্বাৰা মেলেৰীয়া হোৱা ৰোগীৰ সংখ্যা ১৯৪ গৰাকী। অকল যে লুংচুং এলেকাতে মেলেৰিয়া ৰোগে ভয়াৱহ ৰূপ ধাৰণ কৰিছে এনে নহয় বৰং কোকৰাঝাৰ মহকুমাৰ অন্তৰ্গত বালাজান খণ্ড প্ৰাথমিক স্বাস্থ্যকেন্দ্ৰ, দোতমা খণ্ড প্ৰাথমিক স্বাস্থ্যকেন্দ্ৰ আৰু কচুগাঁও খণ্ড প্ৰাথমিক স্বাস্থ্যকেন্দ্ৰৰ অধীনত সৰ্বমুঠ ১৭৬১ গৰাকী লোক মেলেৰীয়াত আক্ৰান্ত হৈছে ।
