( অপূৰ্ব দাস )
শৰীৰটো সুস্থ আৰু সৱল কৰি ৰাখিবলৈ খাদ্য পুষ্টিকৰ খোৱাটো আটাইতকৈ গুৰুত্বপূৰ্ণ বুলি বিবেচিত । আমি যি খাওঁ তাৰ প্ৰত্যক্ষ প্ৰভাৱ আমাৰ স্বাস্থ্যৰ ওপৰত পৰে। এই কাৰণেই স্বাস্থ্য বিশেষজ্ঞসকলে সকলো মানুহকে এনে বস্তু খাবলৈ পৰামৰ্শ দিয়ে যিয়ে শৰীৰৰ প্ৰয়োজনীয় সকলো পুষ্টিকৰ উপাদানৰ প্ৰয়োজন পূৰণ কৰিব পাৰে।
আমি সকলোৱে প্ৰায়ে প্ৰ’টিন আৰু ভিটামিনৰ প্ৰয়োজনীয়তাৰ কথা কওঁ, কিন্তু এই সকলোবোৰৰ মাজতে বহুতো প্ৰয়োজনীয় খনিজ পদাৰ্থক আওকাণ কৰা হয়, যাৰ অভাৱত বহু অসুবিধাৰ সৃষ্টি হ’ব পাৰে।
মেগনেছিয়াম এনেকুৱা এটা গুৰুত্বপূৰ্ণ খনিজ যিটো আমাৰ শৰীৰৰ বহু গুৰুত্বপূৰ্ণ কাম সুচাৰুৰূপে চলিবলৈ প্ৰয়োজনীয়। ই শৰীৰৰ ৩০০ৰো অধিক এনজাইমৰ কাৰ্য্যকলাপ নিয়ন্ত্ৰণ কৰে। হাড়, পেশী, স্নায়ুতন্ত্ৰ আৰু হৃদযন্ত্ৰ সুস্থ কৰি ৰখাৰ বাবে মেগনেছিয়াম অতি প্ৰয়োজনীয়। আপুনি আপোনাৰ খাদ্যৰ জৰিয়তে এই খনিজ পদাৰ্থটো সহজেই যোগান ধৰিব পাৰে।
মেগনেছিয়াম কিমান প্ৰয়োজন ?
অধ্যয়নত দেখা গৈছে যে পুৰুষক প্ৰতিদিনে খাদ্যৰ জৰিয়তে ৪০০-৪২০ মিলিগ্ৰাম মেগনেছিয়ামৰ প্ৰয়োজন হয়, আনহাতে মহিলাক ৩১০-৩২০ মিলিগ্ৰাম মেগনেছিয়ামৰ প্ৰয়োজন হয়। উদ্ভিদ আৰু প্ৰাণী ভিত্তিক খাদ্যত মেগনেছিয়াম বহুলভাৱে পোৱা যায়। পালেং , বীন, শুকান ফল, ৰঙালাউৰ গুটি আৰু গোটা শস্য আদিৰ লগতে সেউজীয়া পাতৰ শাক-পাচলি মেগনেছিয়ামৰ ভাল উৎস।
মেগনেছিয়ামৰ অভাৱত থকা লোকৰ কেনেধৰণৰ সমস্যা হ’ব পাৰে জানো আহক-
• পেশীৰ বিষ আৰু দুৰ্বলতা :
মেগনেছিয়ামৰ অভাৱত পেশীৰ কাৰ্য্যত প্ৰভাৱ পৰিব পাৰে, যাৰ ফলত বিষ, দুৰ্বলতা আৰু ভাগৰুৱা হ’ব পাৰে। পেশীৰ সংকোচন আৰু শিথিলতা প্ৰক্ৰিয়া নিয়ন্ত্ৰণ কৰাত ই গুৰুত্বপূৰ্ণ ভূমিকা পালন কৰে। মেগনেছিয়ামৰ অভাৱত ভৰি, হাত আৰু পেটৰ পেশীৰ দুৰ্বলতাৰ সমস্যা বেছিকৈ দেখা যায়। আপুনি অলপ কাম কৰিলেই অত্যন্ত ভাগৰ আৰু দুৰ্বলতা অনুভৱ কৰিব পাৰে।
• হৃদযন্ত্ৰৰ সমস্যা :
হৃদস্পন্দন আৰু ৰক্তচাপ নিয়ন্ত্ৰণৰ বাবেও মেগনেছিয়াম গুৰুত্বপূৰ্ণ। ইয়াৰ অভাৱত হৃদস্পন্দন অস্বাভাৱিক হোৱাৰ লগতে ৰক্তচাপ বৃদ্ধি পাব পাৰে। যদি এই ধৰণৰ অৱস্থা দীৰ্ঘদিন ধৰি থাকে তেন্তে হাৰ্ট এটেক আৰু উচ্চ ৰক্তচাপৰ দৰে সমস্যাৰ সম্ভাৱনা বৃদ্ধি পায়। অধ্যয়নত দেখা গৈছে যে হৃদযন্ত্ৰ সুস্থ কৰি ৰাখিবলৈ উপযুক্ত পৰিমাণৰ মেগনেছিয়াম অতি প্ৰয়োজনীয়।
• অনিদ্ৰা আৰু টোপনিৰ সমস্যা :
মেগনেছিয়ামে মগজুত Gaba নামৰ এটা নিউৰ’ট্ৰান্সমিটাৰ সক্ৰিয় কৰে, যিটো মানসিক শান্তি আৰু ভাল টোপনি লাভৰ বাবে অতি প্ৰয়োজনীয়। মেগনেছিয়ামৰ অভাৱ হোৱা লোকৰ অনিদ্ৰা বা টোপনি নোহোৱাৰ সমস্যা বাঢ়িব পাৰে। ইয়াৰ ফলত ব্যক্তিজনৰ টোপনিৰ চক্ৰত ব্যাঘাত জন্মে। ভাল টোপনি নোপোৱাৰ ফলত মানসিক স্বাস্থ্যৰ সমস্যা যেনে মানসিক চাপ আৰু হতাশাৰ সম্ভাৱনাও যথেষ্ট বৃদ্ধি পাব পাৰে। হজমৰ সমস্যা আৰু গেছট্ৰিকত ভুগি থকা লোকৰ মেগনেছিয়ামৰ অভাৱে দেখা দিয়ে। সেয়েহে এনে সমস্যা থাকিলে নিৰ্মূল কৰিবলৈ চেষ্টা কৰা উচিত।
