( অপূৰ্ব দাস )
উপকৰণঃ
১/ মইদা ৩-৪ কাপ
২/ ৰিফাইন তেল ভাজিবলৈ
৩/ ঘী ৩-৪ চামুচ মান
৪/ বেকিং চোডা এচিকুট
৫/ চেনি ৩-৪ কাপ
৬/ ইলাচিৰ গুড়ি ১ চামুচ
প্ৰণালীঃ
প্ৰথমতে মইদা খিনি ভালদৰে চালি ল'ব। এতিয়া এটা পাত্ৰত মইদাখিনি ল'ব। মইদাত বেকিং চোডা আৰু ইলাচি পাউডাৰ যোগ কৰিব আৰু ভালদৰে হাতেৰে মিহলি কৰিব। এতিয়া ঘী মিহলি কৰি ভালদৰে সানিব। অলপ অলপকৈ পানী ছটিয়াই ভালদৰে মইদাখিনি মঠি ল'ব।
পৰঠা বা ৰুটি বনাবলৈ প্ৰস্তুত কৰাৰতকৈ অলপ টান হ'ব লাগিব। ভালদৰে মঠি থাকিব ১০/১৫ মিনিট।
ইয়াৰ পিছত বেলনাৰে ডাঠকৈ বেলি নিজৰ আকৃতিত কাটি লৈ ৰিফাইন তেলত ৰঙচুৱাকৈ কম জুইত ভাঁজিব।
সকলোখিনি ভজা হোৱাৰ পিছত চেনিৰ চিৰাপ প্ৰস্তুত কৰিব ।
৪ কাপ পানীত ৪ কাপ চেনি পগাই থাকিব। যেতিয়া হাতৰ দুটি আঙুলিৰে চুলে আঠাৰ লগতে তাঁৰৰ নিচিনা হয় তেতিয়া চেনিৰ চিৰাপটো হৈছে বুলি অনুমান কৰা হয়।
ভাঁজি লোৱা মইদাৰ খৰমাবোৰ চেনিৰ গোটা ঘোলত ইলুটি-সিলুটি কৰি থাকিব। চেনিৰ চিৰাপটো শুকাই লাগি ধৰিলে সুন্দৰকৈ এটা এটাকৈ আঁতৰাই ভালদৰে সজাই চাহৰ লগত পৰিৱেশন কৰিব।
