By Good Assam
ফল বা ইয়াৰ ৰস সেৱন কৰাটো শৰীৰৰ বাবে অতি উপকাৰী বুলি বিবেচিত হয়। ফলৰ ৰসত প্ৰচুৰ পৰিমাণে পুষ্টিকৰ উপাদান থাকে যিয়ে শৰীৰক শক্তিশালী কৰাত সহায় কৰিব পাৰে আৰু বহু ধৰণৰ ৰোগৰ পৰা আপোনাক সুৰক্ষিত কৰি ৰাখিব পাৰে। নিয়মিতভাৱে ডালিম, কমলা, নেমু আৰু আনাৰসৰ দৰে ফলৰ ৰস সেৱন কৰিলে স্বাস্থ্যৰ বাবে অতি উপকাৰী বুলি কোৱা হয়। কিন্তু দোকানত পোৱা পেকেড কৰা ফলৰ ৰস সেৱন কৰেনে?
স্বাস্থ্য বিশেষজ্ঞৰ মতে, সতেজ ফলৰ ৰস সেৱন কৰিলেহে ফলৰ ৰস আপোনাৰ বাবে উপকাৰী বুলি গণ্য কৰা হয়। পেক কৰা ফলৰ ৰস বজাৰত বা দোকানত সহজে পোৱা যায়, ইয়াৰ সোৱাদ একে আৰু কোম্পানীসমূহেও দাবী কৰে যে ইয়াৰ দ্বাৰা স্বাস্থ্যৰ বহু উপকাৰ হ’ব পাৰে।
কিন্তু পেকেটত ভৰোৱা ৰস সতেজ ফলৰ ৰসৰ দৰে উপকাৰী নেকি? সকলোৱে সেৱন কৰা উচিত নেকি? জানিবলৈ পঢ়িব।
সাৱধান ! পেক কৰা ৰসত ক্ষতিকাৰক উপাদান থাকে :
সমগ্ৰ বিশ্বতে ফলৰ ৰসৰ সহজ উপলব্ধতা নিশ্চিত কৰিবলৈ পেকেটত ভৰোৱা ৰসৰ ধাৰা দ্ৰুতগতিত বৃদ্ধি পাইছে। যদিও এই ৰসবোৰত ফলৰ ৰস থাকে, তথাপিও ইয়াক অধিক সুস্বাদু কৰিবলৈ প্ৰায়ে সোৱাদৰ বাবে চেনি আৰু অন্যান্য ৰাসায়নিক পদাৰ্থ আৰু খাদ্যৰ ৰং যোগ কৰা হয়। এই ৰসবোৰ দীৰ্ঘদিনলৈ নষ্ট নহ’বৰ বাবে ইয়াত বহু ধৰণৰ সংৰক্ষক দ্ৰব্য যোগ কৰা হয়। এই সকলোবোৰৰ উপৰিও পেক কৰা ৰসত অধিক পৰিমাণে যোগ কৰা চেনিও থাকে। এই সকলোবোৰ উপাদান শৰীৰৰ বাবে অতি ক্ষতিকাৰক ।
ইয়াৰ উপৰিও ২০১৯ চনৰ জানুৱাৰী মাহৰ এক প্ৰতিবেদনত উল্লেখ কৰা হৈছে যে বহুতো পেকেটত ভৰোৱা ফলৰ ৰসত সীহ বা অন্যান্য ধাতুও পোৱা গৈছে।
অধ্যয়নত কি পোৱা গৈছে?
আমেৰিকাত পেকেজড জুচ বিক্ৰী কৰা ২৪টা ৰাষ্ট্ৰীয় আৰু ব্যক্তিগত ব্ৰেণ্ডৰ পৰীক্ষা কৰা হৈছিল। ইয়াত বিভিন্ন সোৱাদযুক্ত ৪৫ প্ৰকাৰৰ ৰস পৰীক্ষা কৰা হৈছিল। খবৰ অনুসৰি ইয়াৰে বহুতৰে সীহৰ মাত্ৰা অতি উচ্চ আছিল। এই ধাতুবোৰে শিশুৰ স্নায়ু বিকাশৰ সমস্যাৰ সৃষ্টি কৰে আৰু মানসিক ৰোগ সৃষ্টি কৰে লগতে কেন্সাৰৰ দৰে ৰোগৰ সৃষ্টি কৰে।
ইয়াৰ উপৰিও বিক্ৰী হোৱা বহু জনপ্ৰিয় ব্ৰেণ্ডৰ আপেলৰ ৰসত প্ৰতিটো কেনত ১৪ গ্ৰাম পৰ্যন্ত চেনি আছিল। ই প্ৰায় ৩ চামুচ চেনিৰ সমতুল্য। অধ্যয়নত দেখা গৈছে যে যোগ কৰা চেনি আমাৰ শৰীৰৰ বাবে অতি ক্ষতিকাৰক।
খাদ্য বিশেষজ্ঞসকলে কি কয়?
ডায়েটিচিয়ান সকলে কয়, ফলৰ ৰসৰ লগতে পেকেটত থোৱা ৰসত থকা বহু উপাদানে ক্ষতিকাৰক প্ৰভাৱ পেলায়। বিশেষকৈ ইয়াত যোগ কৰা চেনিৰ পৰিমাণে মেদবহুলতা, ডায়েবেটিছ আদি বহুতো সমস্যা বৃদ্ধি কৰিব পাৰে। ডায়েবেটিছ ৰোগীয়ে এই ধৰণৰ ৰস খোৱাৰ পৰা বিৰত থাকিব লাগে।
যিবোৰ ৰসত সংৰক্ষক পদাৰ্থ নাথাকে সেইবোৰৰ সোনকালে নষ্ট হয়। সেয়েহে বহুদিনলৈ ফলৰ ৰস ভালে থাকিবলৈ সংৰক্ষক মিহলাই দিয়ে। সংৰক্ষক দ্ৰব্য যুক্ত বস্তু দীৰ্ঘদিন সেৱন কৰিলে বহু ধৰণৰ দীৰ্ঘদিনীয়া ৰোগ বৃদ্ধি হোৱা বুলি অধ্যয়নত পোৱা গৈছে। এই কাৰণেই পেকেটত ভৰোৱা ৰস সতেজ ৰসৰ দৰে সুৰক্ষামূলক নহয়।
গোটা ফল বেছি উপকাৰী :
খাদ্য বিশেষজ্ঞসকলে কয় যে, বজাৰৰ ৰসৰ সলনি গোটা ঘৰুৱা ফল খালে অধিক উপকাৰী, ইয়াৰ ফলত অধিক আঁহ পোৱা যায়। ফাইবাৰে বহু ধৰণৰ কেন্সাৰৰ সম্ভাৱনা হ্ৰাস কৰাত সহায় কৰে, কলেষ্টেৰল আৰু ৰক্তচাপ নিয়ন্ত্ৰণ কৰে। ইয়াৰ উপৰিও গোটা ফলত ভিটামিনো বেছি থাকে। ৰস তৈয়াৰ কৰাৰ প্ৰক্ৰিয়াত আঁহ আৰু ভিটামিনৰ পৰিমাণ কমি যায়।
যদি আপুনি ফল-মূল খাব নোৱাৰে তেন্তে সতেজ ফলৰ ৰস খাব। পেক কৰা ৰস খোৱাটো কম কৰিব লাগে। এইবোৰ বিজ্ঞাপনত কোৱাৰ দৰে উপকাৰী নহয়।
